Alejandro Ruiz galdakoztarra «Vascos por el mundo» saioko protagonista
TESTUA: Jon Gomez Garai
ARGAZKIA: Vascos por el mundo, ETB
Munduko bazter desberdinetako euskal herritarrak ezagutarazten dituen ETB-2ko «Vascos por el mundo» saioaren azken emanaldia Georgian grabatu zuten. Eta saio honen azken protagonista Alejandro Ruiz galdakoztarra izan da.
Alejandro Ruiz Suarez galdakoztarrak urte eta erdi darama Georgiako hirian bizitzen, Tbilisin, eta ETBren bigarren kateko «Vascos por el mundo» saioko azken atalean izan da protagonista, herrialde horretatik grabatutako programan.
Georgiara lagun bat bisitatzera joan zen Ruiz, eta han lan egiteko zeuden aukerak ikusita bertan geratzea erabaki zuen. Urte eta erdi pasa da ordutik. Galdakoztarrak marketing digitaleko enpresa bat dauka, eta ETBko saioari kontatu zion moduan, Georgian iragarkiak —eta marketing-a, oro har— «oso modu tradizionalean» egiten dituztela ohartu zen, eta horregatik erabaki omen zuen bertan geratzea, «lan aukera» bat ikusten baitzuen horretan.
Hirian amaitu dute Georgia protagonista duen «Vascos por el mundo» saioa, eta amaiera hori galdakoztarra elkarrizketatuta egin dute. Tbilisiko katedralean aurkeztu dute Alejandro Ruiz, munduko hirugarren katedral ortodoxorik handienean.
Kontutxo asko kontatu zituen galdakoztarrak ETBko kameren aurrean, besteak beste: Georgian «bizitza egiten» goizeko hamarretan hasten direla, Euskal Herriko txosnak eta tabernak faltan igartzen dituela, georgiarrak ligatzeko «oso konplikatuak» direla… Baina gainera, bitxikeri bat ere erakutsi zuen Ruizek «Vascos por el mundo» saioan. Tbilisiko unibertsitatean Gernikako arbolaren kimu bat landatuta dutena.
Alejandrok berak azaldu zion saioko erreportariari: «Hemen Georgian, Euskadikoa zarela esaten duzun bakoitzean, eurek georgiarrekin lotura bat dugula esaten dute, hizkuntzan eta izaeran; eta konexio hori islatzeko erabaki zuten Gernikako arbolaren kimu bat landatzea bertan».
Inguruko mendi batzuetara bisitan ere eraman zituen ETBkoak Alejandrok, eta haitz batzuetan eskalada egitera ere animatu ziren kazetaria eta protagonista galdakoztarra.
«Familia, lagunak eta janaria dira hemen faltan igartzen ditudanak» esan zuen galdakoztarrak mendiz inguratutako sekuentzian, eta erreportariak familiak eta lagunek ere bera faltan dutela erantzun zion, lagun askok eta senideek Galdakaotik bertatik bidalitako bideotxoak erakutsita.
