Elkarlaguntzan
BINKE / 2022ko urtarrila

Emakumea eta pobrea izatea zer den…

TESTUA ETA ARGAZKIA: Elkarlaguntza Sareko ELEAK taldea

Emakumea eta pobrea izatea zapalkuntza bikoitza da. Iritzi horretakoak garen hainbat pertsonak osatzen dugu ELEAK taldea, Galdakaoko Elkarlaguntza Sarearen beste geruza bat. Duela ez asko hasi ginen bilerak eta elkarreratzeak egiten.

Sare bat osatzen dugu: elkar entzun, ezagutu, defendatu, mimatu… inklusioa testuinguru dugularik. Neskak gara guztiak. Politikoki zuzen zer dagoen baino, eraginkorra zer den eta zilegia zer den lehenesten dugulako: gugana hurbiltzen den emakume horrek agian beste emakume batek bakarrik eman diezaiokeen babes eta erosotasuna behar duelako bere erraietan duen hori askatzeko. Eta erraietan duten marapilo horiei eman nahi zaie protagonismoa, baina asistentzialismotik ospa eginez, komunitate bat eraikitzen.

Gure aletxo nagusiak egunerokotasunean emakumeek aurki ditzaketen oztopoei aurre egiteko erein dira. Pandemia garaian emakume asko, etxeetako langileak nagusiki, kaleratuak izan dira. Anitzak dira kontraturik gabe, lan gabe eta diru gabe geratu direnak. Familia ugari egoera prekarioan daude. 

Bide prekarioan igo beharreko maldak maiz nekagarriegiak dira: lan arazoak, dibortziatzerakoan arazoak, arazo burokratikoengatik NIE-a ezin berriztatzea, bankuek jartzen dituzten oztopoak kontu korronte bat zabaltzeko, hainbat diru laguntza jasotzeko eskubideen urraketa… 

Guzti honen aurrean ezin dugu entzungor egin eta kritiko bihurtu gara. Banketxeen sistema heteropatriarkala, klasista eta matxista dela oihukatu nahi dugu. Europa eta Espainia mailan oinarrizko eskubideak betetzen ez direla salatu nahi dugu. Zerbitzu sozialetan eskaintzen den arreta enpatiatik asko urruntzen dela deritzogu. 

Gure presentzia Galdakaon oraindik xumea da. Agian ez-jakintasunagatik, agian beldurragatik, agian karga familiarra eta bilkurak ezin uztartzeagatik… ez dira emakume gehiegi gugana hurreratu direnak. Hala ere, familia bat eraikitzeko lehen pausoak eman ditugu guztion artean eta indartzen joateko esperantza eta ekimena daukagu: kale ekintzak burutzen hasi gara, asanblada irekiak, erresistentzia kutxa sortzen, gai ezberdinetan jakituna den jendearen informazio esanguratsua eskuratzen… Eta horrela, ereiten gabiltzanak bere fruituak emango dituelakoan gaude, udaberri humanoago eta justuago bat irudikatu arte.