Zinema
BINKE / 2021eko urria

Gaizka Chamizo galdakoztarrak «Maixabel» filman hartu du parte

TESTUA: Jon Gomez Garai
ARGAZKIAK: David Herranz

Arrakastatsua izaten ari da ETAren biktima Maixabel Lasa protagonista duen film berria. Galdakaon, esaterako, pasa den asteburuan eskainitako sei emanaldietan 481 sarrera saldu dira —«oso emaitza ona zubia izateko», zinemako arduradunaren iritziz—. Bada, bertan aritu da etakide paperean Gaizka Chamizo aktore galdakoztarra. Berarekin hitz egin du Binkek, eta orain zertan dabilen jakiteaz gain, pelikularen inguruko esperientzia eta iritzia ezagutu ditugu.

Juan Mari Jauregi Legorretatik Deustuko Unibertsitatera Soziologia ikasketak egitera joan zen, eta, Basauriko espetxean espetxeratuta bitan egon eta gero, ETA alde batera uztea eta PCEko militante izatea erabaki zuen 1973. urtean. Hortik, PSEra igaro zen 1980ko hamarkadaren bukaeran. Eta horren ondotik izan zen Tolosako PSE-EEko zinegotzi eta Gipuzkoako Gobernadore Zibil. ETAk 2000. urtean hil zuen, 48 urte zituela.

Bere alargunak, Maixabel Lasak, senarra erail eta hamaika urtera, ezohiko eskaera bat jaso zuen: hiltzaileetako batek Langraizeko espetxean berarekin hitz egiteko eskatu zuen, Luis Carrasco etakide oihak. Ostean Ibon Etxezarretak ere gauza bera eskatu zuen, eta hainbat zalantzaren ostean, Lasak aurrez aurreko hitzorduak onartu zituen. Etxezarreta Jauregiri egin zitzaion omenaldi batean ere izan zen.

Benetan gertatutako historio honek fikziora egin du salto aurten, Iciar Bollaín aktore eta zinema-zuzendari madrildarrak pantaila handira eramanez «Maixabel» filma —Donostiako Zinemaldian saritua—.

Blanca Portillo —Maixabel Lasa alarguna— eta Luis Tosar —Ibon Etxezarreta etakidea— aktore espainiar ezagunak dira protagonista eta euskaldun askok ere osatu du aktore-zerrenda: Urko Olazabal, Patxo Telleria, Getari Etxegarai, Asier Hormaza… eta Gaizka Chamizo galdakoztarra.

Chamizok Langraizko espetxean dagoen etakidearen papera egiten du filman. «Paper txikia» deritzona da galdakoztarrarena, berbaz entzuten ez bazaio ere, figurante bat baino zerbait gehiago egiten baitu. Eta berarekin parte-hartze horren inguruan hitz egin gura izan du Binkek.

Ikaskuntza handia

Esperientzia «oso oso polita» izan da Chamizorentzat Maixabel filma grabatu izana, eta oso eskertuta dago eman dioten aukeragatik, «esperientzia berri guztietan bezala, ikaskuntza handia izan delako hau ere», adierazi dio aktoreak aldizkari honi.

Hein batean penarekin geratu da Gaizka filmaren amaierako emaitzarekin, eta halaxe kontatu dio Binkeri: «Penarekin geratu naiz, oso argudio potentea bazuen ere, lanaren mezua oso hankamotz geratu dalako pantailetan». Hala ere, aktoreak ulertzen du «pertsona eta une zehatz batzuen biografia baino ez dela lan hau, ez erakunde eta historia luze baten kontakizuna». Guztiaren gainetik, «pelikula oso ona da, mimo handiz eginda dago eta zuzendariaren sinadura nabari da kalitatean», dio Chamizok.

Bere agerraldiak Langraizko espetxe zaharrean grabatuta daude. Aurtengo otsaila eta martxoa bitartean grabatu zuten filma eta berari azaroan deitu zioten lan honetarako: «Bizitzako une batzuetan izan nezakeen zapaia apurtu dit lan honek, lan berria egiteko aukera eskaini didalako». Horixe dio pelikulako «etakideak», berak esperientzia duelako antzerkian baina ez ikus-entzunezkoetan.

Askorik aurreratu ezin bada ere, Gaizka Chamizo «Irati» filma grabatzen ari da orain. «Errementari» ostean, Paul Urkijoren bigarren lan luzea izango da hau, eta Itziar Ituñoren edo Eneko Sagardoyren neurriko aktoreak izango ditu protagonista.

Albiste honekin lotuta…