Aperribaiko Sareak Ehuntzen proiektuari eman dio pintxo solidarioaren dirua Peña Santa Cruzek
TESTUA ETA IRUDIAK: Irati Alonso García
Peña Santa Cruzek 1.950 euro bildu zituen Galdakaoko Mikologia Jardunaldien 56. edizioaren pintxo solidarioarekin. Aperribaiko Laguntza Sareak Ehuntzen proiektuari eman dio dirua, Basandere Elkartearen bidez.
Galdakaoko Mikologia Jardunaldien 56. edizioa antolatu zuen azaroan Peña Santa Cruz elkarteak eta honen baitan, besteak beste, pintxo solidarioa antolatu zen. Honekin 1.950 euro bildu zituen elkarteak eta ohi bezala, helburu sozial eta komunitarioko elkarte bati eman dio.
Kasu honetan, dirua Aperribaiko Laguntza Sareak Ehuntzen proiektuari eman dio, Basandere Elkartearen bidez. Urtero bezala, Udalaren esku utzi du onuradunaren proposamena eta Amets Iturbe Gizarte Ekintzako zinegotziak azaldu du Sareak Ehuntzen babestearen arrazoia: «Proiektuak duen eraginagatik, bultzatzen dituen egitasmoek behar handiena dutenen bizi kalitatea hobetzen laguntzen duelako, elkartasuna eta lankidetza bezalako balioak aktibatzen dituelako, eta herritarren parte hartze aktiboa sustatzen duelako».
Atzo egin zuten dohaintza ekitaldia eta honetan Iturbe eta Peña Santa Cruzeko Javier Bilbao, Javier Irusta eta Alfonso Requero izan ziren eta baita Susana Viteri, Basandereko presidentea ere, proiektuan parte hartzen duten hainbat auzokideekin batera. Bertan izan zen baita ere Aperribaiko ikastetxe publikoko guraso elkartearen ordezkaritza.
Viterik azaldu zuenez, «lankidetza ekimen honi esker, zailtasun ekonomiko edo logistikoengatik sare hori gabe eskuraezinak izango liratekeen jarduerak egin dira, eta laguntza honek lan hori errazten du». Horregatik, eskerrak eman zizkion Santa Cruzi.
Proposamen horien artean pilates klaseak, kakorratz klaseak, irakurketa kluba edo Armairu Solidarioa daude, besteak beste. Armairu hori Eperlandako eskola zaharretan dago, eta beharra duten Aperribaiko familiek arropa, jostailuak eta beste objektu batzuk har ditzakete. Eguazten arratsaldeetan irekitzen da, informazio, harrera eta asistentzia zerbitzuaren ordutegi berean: 16:30etik 19:30era.
Hemen Amets Iturbe zinegotziaren eta Irene Rodero Basandereko kidearen hitzak dohaintzaren inguruan:
