ZarataK musika taldea
BINKE / 2022ko urtarrila

«Taldea, bere osotasunean, galdakoztarra da»

Elene, Aitor, Asier eta Aner galdakoztarrak dira jaio berri den Akëer proiektuaren atzean dauden kideak. ZarataK izenarekin aurkeztu dute haien burua orain arte sare zein eskainitako kontzertuetan, baina Binkeri primiziaz helarazi diotenez aurki dira izenez aldatzekoak.

Bi kontzertu, biak Galdakaon. Zer moduz hastapenak? Itzela! Espero baino hasiera hobea izan dugu. Taldekide guztiok haur ginenetik buruan izan dugun asmo bat izan da musika munduan hastea. Bi kontzertu hauek nolabait erakutsi digute zeintzuk izango diren gure ibilbide, poz eta zailtasunak. Eskerrak eman nahi dizkiogu Galdakaoko Udalari horrelako aukerak emateagatik.

Nola eman zenioten forma proiektuari? Taldea bere osotasunean galdakoztarra da eta txikitatik ezagutu dugu elkar Asier (bateria), Elene (abeslaria) eta hirurok (Aner, gitarrista). Taldea itxuratzen hasi ginen 2018an. Asier, «Josebounder» (irakaslea, baxua) eta hirurok elkartuz joan ginen Musika Eskolan entseguak egiteko pare bat urtez. Konfinamendua amaitu zenean, Elene sartu zen musika eskolako talde horretan. Urtebete geroago, «jaietan» jotzeko aukera ikusi genuenean Aitorri (baxua), Asierren klasekide bati, gurekin jotzeko esan genion. Eta hortik sortu zen dena.

Baduzue harremanik Galdakaoko beste talderen batekin? Momentuz ez dugu harreman handirik garatu Galdakaoko musika taldeekin, musikari horietako batzuekin eszenatokia partekatzeaz gain. Baina gehienok ezagutzea eta haiekin harremana izatea espero dugu.

Musikari ikuspuntutik, zer eskatzen diozue Galdakaoko Udalari? Taldeen entseguak ahalbidetzeko lokal batzuk erraztea iruditzen zaigu gauzarik garrantzitsuena. Alokatu daitezkeen lokal batzuk, eta ez gazteon txami propioak. Izan ere, azkenengo hauek garesti egiten zaizkigu. Horretaz gain, Udalak antolatutako kontzertuetan, ondo legoke Udalak berak zenbait bozgorailu, mikro edo pedal hornitzea; kontuan izanda talde txiki batzuk, gu barne, ez ditugula kalitatezko materialak, areto batean publiko guztiak entzuteko modukoak.

Imajinatu talde baten hasierako gonbidatu zaretela. Zein gustatuko litzaizueke izatea taldea? Nahiz eta gustu batzuetan bat etorri, nahiko gustu ezberdinak ditugu. Gaur eguneko taldeetatik asko gustatuko litzaiguke Belako, Toc, Lukiek edo Eskean Kristörentzako jotzea adibidez. Baina asko ditugu gustuko talde zaharrak ere, Nirvana, ACDC, Misfits, Hole etab. adibidez.

Baduzue esku artean epe labur zein luzerako helbururik? Etorkizunerantz begira, gure kantak egiteko eta kaleratzeko asmoa dugu, taldean badugulako kantautore bat. Horretaz gain, kontzertu askoz gehiago eta handiagoak egitea espero dugu.