Komunikazioa eta euskara
BINKE / 2022ko otsaila

Binkeren lehen sei urteetako zenbaki guztiak Torrezabaleko liburutegian daude eskuragai

TESTUA ETA ARGAZKIA: Jon Gomez Garai

Binkek 2016ko urtarriletik 2021eko abendura bitarte argitaratutako paperezko edizioaren 66 zenbakiak urteka banatuta liburu bilakatu eta Torrezabal Kultur Etxeko liburutegi nagusian utzi ditu, herritarrek noiznahi eskura izan ditzaten.

Zazpigarren urtea betetzen ari da Binke, Galdakaoko eta Usansoloko komunikabidea. Herritar talde batek 2015ean proiektuaren diseinua egin eta 2016ko urtarrilean kaleratu zuen Binkeren lehenengo zenbakia aldizkari formatuan.

Gaur, aldizkari batetik harago euskarri anitzeko hedabidea da Binke, eta irakurtzen ari zaren lerro hauek batzen dituen webgunea duzu horren adibide. Baina Binkeren oinarria paperezko edizioa da, eta hilero 14.000 ale kaleratzen ditu Galdakaoko, Usansoloko eta inguruko auzune guztietan. Banaketa kanpainarik handiena egiten du hedabide honek, eta bakarra da gure herriak bere horretan aintzat hartzen dituena modu esklusiboan, Galdakao eta Usansolo bereiztuz baina bestelako herriekin nahastu barik. Eta euskaraz.

Papera oinarri izanik, 2016ko urtarriletik 2021eko abendura bitarte argitaratutako 66 zenbakiak urteka banatutako liburuetan batu ditu Binkeren Batzorde Orokorrak, orain arte argitaratutako zenbaki guztiak kolekzio berezi bakarrean izateko eskura. Eta sei urte horietako liburuak Torrezabal Kultur Etxeko liburutegi nagusian daude eskuragai. Horren lekuko izan zen Edurne Espilla Galdakaoko Udalaren Euskara eta Komunikazio zinegotzia. Berari eman zizkioetan liburuak Agurtzane Uribarrik eta Julen Urrutxurtuk Binkeren izenean, honek Udalaren eraikuntza honetan utzi zitzan.

Proiektu honen talde motorrak uste du polita izan daitekela 2021eko abendura arte Binkek argitaratutako 268 elkarrizketak gogoratzea, edo 193 erreportajeak berriz irakurtzea, 178 pertsona desberdinen iritzi artikuluak zeintzuk izan ziren errepasatzea…

Urtero gehitzen joango da Binke Torrezabal Kultur Etxeko liburutegira pasa den urteko liburua.