Break On Stage
BINKE / 2022ko otsaila

Galdakao Dantz dantza urbanoen lehiaketan izena emateko epea ireki dute

TESTUA: Jon Gomez Garai
ARGAZKIA: Galdakaoko Udala

«Break On Stage» dantza urbanoen jaialdiaren atarikotzat hartu den Galdakao Dantz lehiaketa apirilaren 23an antolatuko da Torrezabal Kultur Etxean, eta dagoeneko zabalik dago izena emateko epea. Jakin beharreko guztiak batu ditugu ondoko albiste honetan.

Galdakaoko Udalak «Break On Stage» Euskal Herri mailako jaialdiarekin hitzarmena sinatu zuen, eta geroztik Euskal Herri osoko dantzariak etorri ohi dira gurera Galdakao Dantz izenez bataiatu zuten lehiaketan parte hartzera. Aurten izango du lehiaketak edizio berria, eta izena emateko epea ireki dutela adierazi dute Udaletik.

Dantza urbanoen erakusleihotzak hartu den jaialdi honen edizio galdakoztarra apirilaren 23an antolatuko da Torrezabal Kultur Etxeko areto nagusian. Dagoeneko zabalik dago izena emateko epea eta, gehienez, 30 talde jasotzea aurreikusten du antolakuntzak. Muga hori betetzen denean itxiko da izen emateko aukera; lekuak lehenago betetzen ez badira, apirilaren 1 arte eman ahal izango da izena.

Euskal Herriko dantza urbanoen talde onenen koreografiak ikusi ahalko dira jaialdian, eta Galdakaoko Udalak bidalitako oharrean adierazi du «dantza urbanoen estilo anitzak» egongo direla ikusgai, bi kategoria eta bi txandatan banatuta: 16:00etan junior kategoria —15 urtetik beherakoen dantza koreografikoak— eta 19:00etan kategoria absolutua —16 urtetik garakokoak—.

Aurten gainera, «bestelako dantzei ere lekua egiteko asmoz, kategoria esperimentala zabaldu» dutela adierazi du antolaketak. Horrela ba, dantza garaikideek, modernoek, lirikoek, folklorikoek… ere lekua izango dute oholtzan. Hori bai, koreografia bakoitzak ezin izango du hiru minutuko iraupena gainditu.

Kategoria bakoitzeko irabazleak diruz sarituko dira, eta gainera, maiatzaren 21ean Barakaldon ospatuko den «Break On Stage» jaialdi handirako txartela eskuratzeko aukera izango dute Galdakaon irabazten dutenek.

Epaimahaia dantza garaikidean eta urbanoan adituak diren hiru dantzarik osatuko dute eta jaialdi honek «gazteei baliabide teknikoak eta marko eszenikoa eskaintzea» ditu helburu.

Izena emateko:
stage@breakonstage.com
Taldeak apuntatzen diren ordenean onartuko dira.
Informazio gehiago jasotzeko:
Ander, 610 787 771.