Galdakaok 200.000 euro jasoko ditu Udalaren digitalizazioa bultzatzeko

TESTUA: Irati Alonso García
ARGAZKIA: Mihail Milovanovic

Espainiako Lurralde Politikako Ministerioak 154.000 milioi euro banatuko ditu tokiko instituzioen artean, digitalizazioa bultzatzeko helburuz. EAEn hiru aldundiek eta bederatzi udalek izango dute laguntza hori eta haien artean dago Galdakao, 203.738 euro jasoko dituela.

Espainiako Gobernuak 20.000 eta 50.000 biztanle bitarteko toki-erakundeen eta udal txikien eraldaketa digitala eta modernizazioa bultzatzea du helburutzat eta horretarako laguntzak ematen ditu urtero. Deialdi honetan Berreskuratze Funtsaren parte diren 154 milioi euro banatuko ditu, 295 instituzioen artean.

EAEren kasuan hiru aldundiek eta bederatzi udalek jasoko dute laguntza, Galdakao dagoela haien artean. Udalak 203.738 euro izango ditu instituzioaren digitalizaziorako. Zehazki, hauek dira helburuak:

· Zerbitzu publiko digitalen eskuragarritasuna hobetzea herritar eta enpresentzat.
· Arrakala digitala murriztea.
· Langile publikoen eraginkortasuna hobetzea.
· Eraikitako zerbitzu eta konponbide digitalak berrerabiltzea.
· Sortzen ari diren teknologien erabilera aktiboa sustatzea.

Isabel Rodríguez Espainiako Gobernuko bozeramailearen hitzetan, asmoa argia da: «Tokiko administrazioak herritarrei hurbildu eta zerbitzu publikoen prestazioa hobetu nahi dugu».

Laguntza hauek esleitzeko irizpideak toki-erakundeekin adostu dira, Toki Administrazioaren Batzorde Nazionalaren eta Espainiako Udalerrien eta Probintzien Federazioaren bitartez. EAEn, Galdakaoz gain, hauek dira adostutako udalak eta kopuruak: Sestao (190.064 euro), Santurtzi (318.960 euro), Portugalete (316.724 euro), Durango (208.523 euro), Basauri (282.805 euro), Hernani (141.503 euro), Errenteria (273.756 euro) eta Eibar (192.259 euro).