Galdakaoko Norbega-Coca Cola enpresako 12 langileren kontratuetan irregulartasunak daudela berretsi du Lan Ikuskaritzak, eta horren ondorioz 12.000 euroko kalte-ordaina proposatu du enpresarentzat. Zeintzuk dira berretsi dituen irregulartasunak?
ELA sindikatuak salaketa jarri zuen iaz Lan Ikuskaritzan, aldizkako langile finko gisa kontratatutako Galdakaoko Norbega-Coca Colako 12 langileren kontratuetan irregulartasunak zeudela egiaztatu ondoren.
Orain, Ikuskaritzak arrazoia eman dio ELAri, eta berretsi du Galdakaoko Norbega-Coca Cola enpresak Aldizkako langile finkoen gehiegizko erabilera egiten duela. Izan ere, «kontratu bakar batek ere ez du islatzen jardueraren aurreikusitako iraupena, jardueraren gutxi gorabeherako lanaldia eta aurreikusitako ordu banaketa», sindikatuak azaldu duenez.
Era berean, Ikuskaritzak berretsi du aldizkako kontratu finko guztiek araututako denbora muga gainditzen dutela.
Arrazoi horiengatik, enpresak iruzurrezko kontratu bakoitzeko arau hauste larri bat egiten duela berretsi da, eta guztira 12.000 euroko kalte-ordaina proposatu du Ikuskaritzak.
ELAk adierazi duenez, «aldizkako langile finkoaren modalitatearen abusuak lan ezegonkortasuna eta ziurgabetasuna eragiten ditu». Horregatik, «kontratazioan iruzurra egin denez, salatutako kontratu guztiak lanaldi osoko kontratu mugagabe bihurtzeko eskatu dio Norbegari».
