Zabalik dago Galdakaoko kirol instalazioen arautegia eguneratzeko ekarpenak egiteko aukera
TESTUA: Irati Alonso García
ARGAZKIA: Galdakaoko Udala
Kirol instalazioen arautegia eguneratzeko prozesuan ari da Galdakaoko Udala eta herritarren laguntza eskatu du honetarako. Galdakoztarrek maiatzaren 15era bitarte dute ekarpenak egiteko.
Herritarrek azken urteotan egin dituzten eskaerei erantzunez, kirol instalazioen arautegia eguneratzeko prozesuan ari da Galdakaoko Udala. Instalazioen erabilerarako proposamen berria landua dago, eta aurretiazko informazio publikoan jarrita.
Maiatzaren 15era arte egongo da arautegia informazio publikoan eta herritarrek euren proposamen, ekarpen eta iradokizunak egiteko aukera izango dute egun horretara arte.
Udalaren webgunean ikus daiteke proposamena eta ekarpenak rbueno@galdakao.eus helbidera bidal daitezke.
Ondoren, reglamenduari hasierako onarpena emango zaio osoko bilkuran eta jarraian informazio publikoan egongo da 30 egunez. Epe horretan beste alegaziorik ez badago, behin betirako onartuko da eguneratutako arautegia eta, alegazioren bat egotekotan, berriro pasatu beharko luke udalbatzatik.
