Zabalik dago Helduen Heziketarako Ikastetxe Publikoan matrikulatzeko epea
TESTUA: Irati Alonso García
ARGAZKIA: Galdakaoko Udala
Galdakaoko Helduen Heziketarako Ikastetxe Publikoan matrikulatzeko epea zabalik dago. Ekainaren 29ra bitarte egin daiteke eta albiste honetan batu ditugu horretarako jakin beharrekoak.
Hurrengo ikasturterako Galdakaoko Helduen Heziketarako Ikastetxe Publikoan matrikulatzeko epea zabalik dago. Ekainaren 29ra bitarte egin daiteke eta horretarako informazio guztia lortu daiteke hiru modutan: online, modu presentzialean Urretako zentroan edo telefonoz 944566098 edo 688810808 zenbakietan.
Helduen Heziketarako Ikastetxe Publikoan 18 urte bete dituzten edo matrikulazioa egiten den urte naturalaren barruan betetzen dituzten pertsonak sar daitezke. Oinarrizko prestakuntza ematen du, alfabetatzetik hasi eta Bigarren Hezkuntzako graduatu-titulua lortu arte.
Hiru gradutan banatuta dago, eta azkena osatzean Bigarren Hezkuntzako graduatu-titulua lortuko da. Oinarrizko titulazioa lortu nahi duten pertsonei edo lortzeko irakasgaiak falta zaizkienei zuzenduta daude hauek.
Bestalde, arautu gabeko irakaskuntzako ikastaroak ere eskaintzen ditu «helduen kualifikazioa hobetzera eta beren burua ikasteko eta bizitza soziokulturalean eta lan-munduan parte hartzeko gaitasuna garatzeko helburuz»: hastapen-ikastaroak euskaraz, ingelesez, frantsesez, gaztelaniaz eta informatikan.
