Lurraldetasuna
BINKE / 2022ko martxoa

Usansoloren segregazioaren alde, bozkatu zutenen %81,54

TESTUA ETA IRUDIAK: Jon Gomez Garai

Hainbat urteko eskaeren ostean, eta Galdakaoko Udalean oposizioan dauden alderdi guztien kritikarekin bada ere, usansolotarrek Usansolo udalerri independente izatea gura duten ala ez modu ofizialean bozkatu zuten lehenengoz pasa den domekan: bozketara deituta zeudenen %63,12ak hartu zuen parte eta horien %81,54 segregazioaren alde agertu zen. Binkek eguneko jarraipena egin zuen bere Twitter kontutik, eta bideo-erreportaje hau osatu du egunaren laburpen gisara.

Egun seinalatua izan da martxoaren 27a, Binkek Usansoloren segregazioaren inguruko galdeketa ofizialaren berri otsailaren 11n eman zuenetik. Seinalatua, eta historikoa; galdeketaren alde egon zein ez, Usansolok udalerri independente izan behar duela sinisten dutenentzako zein ez: usansolotarrek lehenengoz izan zutelako atzo, domeka, euren etorkizun administratibo eta politikoaren inguruko iritzia modu ofizialean emateko aukera.

Galdakaoko Udalak bere baliabideekin antolatu zuen galdeketa ofizial hau martxoaren 27an, Udal Gobernuko kide diren EH Bildu, Auzoak, Elkarrekin Podemos eta Usansolo Herriaren erabakiarekin. Erabakia hartu ostetik, galdeketaren aldeko eta kontrako kanpaina hasi zuten alderdi batzuek: Usansolo Herriak aldeko kanpaina egin zuen, Udal Gobernuko beste kideek babestu egin zuten, eta kontrako kanpaina egin zuten aldiz oposizioan dauden EAJk eta PSE-EEk, lehenengoak Usansoloko etxeetan soilik banatutako eskuorri batekin eta PSE-EEk Galdakao osoan banatutakoarekin.

Are gehiago, EAJko bozeramaile den Fernando Izagirrek galdeketa egitearen arriskuaz ohartarazi zuen Binkeren bidez urtarrilaren 26an, Usansolok Espainiak exijitzen dituen 5.000 biztanleak izatearen baldintza betetzen ez duen bitartean ezin izango baita «jendearen ilusio horrekin jolastu» eta galdeketa hau antolatzeagatik «Espainiako Auzitegi Gorenak idazkariaren eta zinegotzien aurka egin dezakela» abisatuz.

Hala ere, galdeketa egin, egin zen, eta normaltasunez egin ere. Binkek egun osoko jarraipena egin zuen bere Twitter kontutik, unean uneko 30 argazki eta bideoz josirik. Beheko txio honen haritik segika ikus-entzun daiteke egun osoko kontakizuna:

«Nahi al duzu Usansolo udalerri independente gisa eratzea?» galdetu zitzaien Usansolon erroldatutako 16 urtetik gorako —galdeketek halaxe baimentzen dutelako, hauteskundeek ez bezala— 3.771 herritarrei.

Botoa emateko aukera zuten herritarren %63,12ak hartu zuen galdeketan parte, 2.302 pertsonak guztira. Behin galdeketa eginda, hauek izan ziren bozketak utzitako behin betiko emaitzak, botoen %100 zenbatuta:

• Bai: %81,54 (1.877 boto)
• Ez: %%14,29 (329 boto)
• ED/EE: %2,04 (47 boto)
• Baliogabeak: %1,22 (28 boto)
• Zuri: %0,91 (21 boto)

Orain, emaitza hauekin —eta Usansoloren segregazioa eta hau burutuz gero Galdakaori utziko lioken egoera aztertzen duen memoria— eskuan, Galdakaoko Udalak Bizkaiko Foru Aldundiari helaraziko dizkio aipatutako datuok. Ez baitzen galdeketa hau loteslea izan, hau da, erabakitakoa ez da berehala indarrean jarriko. Orduan beraz, Bizkaiko Batzar Nagusiak izan beharko dira domekako galdeketa honi kasu egiten diotenak edo ez.

Monika Mena Usansolo Herria plataformako bozeramaileak «Bizkaiak galdeketa honen emaitzari baiezkoa emongo deutsola» uste du, Binkeri hala kontatu zion moduan eta 2021eko uztailean Bizkaiko alderdi guztien ahozko babesa jaso ostean —Binkek batu zuen bezala—.

Baina segregazio prozesu honi Bizkaiak babesa ematen badio ere, ikusi beharko da gero Espainiako Auzitegi Gorenak zein bide hartzen duen eta Usansolo Bizkaiko 113. udalerria izatea ahalbidetzen duen edo ez.

Albiste honekin lotuta…