‘Ezagutu zure herria’ galdera erronka antolatu dute Galdakaon, tokiko merkataritza sustatzeko
TESTUA: Irati Alonso García
ARGAZKIA: Beetrack
Gu Dendari elkarteak, Galdakaoko Udalaren laguntzarekin, ‘Ezagutu zure herria’ galdera erronka abiatu du, tokiko merkataritza sustatzeko helburuz. Bezeroek QR kode bat jasoko dute erosketa bakoitzeko eta kode horrek eguneko galderarako sarbidea emango die.
Tokiko merkataritza modu dibertigarrian dinamizatzeko helburuarekin, ‘Ezagutu zure herria’ kanpaina abiatu du Gu Dendari elkarteak, Galdakaoko Udalarekin elkarlanean.
Gaurtik, ekainak 19, uztailaren 9ra bitarte jarriko da martxan eta galdera eta erantzunen joko formatua du, zeinetan Galdakaoko dendetan egindako erosketen bidez parte hartu ahal izango den. Bezeroak QR kode bat jasoko du erosketa bakoitzeko, eta kode horrek eguneko galderarako sarbidea emango dio. Hori herriko historiarekin, kulturarekin, leku enblematikoekin eta pertsonaia ospetsuekin lotuta egongo da beti.
Galderak astelehenetik zapatura egongo dira eskuragarri, 10:00etatik 20:00etara —domeketan ez da galderarik egingo— eta egun bakoitzeko galdera zuzen erantzun duten guztien artean Torrezabal Kultur Etxerako 16 zinema sarrera bikoitz zozketatuko dira sari gisa. Gainera, kanpaina osoan zehar behar bezala erantzuten duen 500. pertsonak opari txartel bat jasoko du.
Pertsona bakoitzak egunean behin parte hartu ahal izango du jokoan. Kanpaina amaitzean saririk banatu gabe geratzen bada, zozketa osagarria egingo da parte hartu baina saririk lortu ez duten pertsonen artean. Sarrerak eta opari txartela Gu Dendariren bulegoan jaso beharko dira, 09:00etatik 14:00etara.
