![](https://binke.eus/wp-content/uploads/2024/07/BINKE-FB-rockein-azken-eguna-web-660x400.jpg)
Gaur da Rockein musika lehiaketan izena emateko azken eguna
TESTUA: Irati Alonso García
ARGAZKIA: Mondo Sonoro
Hego Euskal Herriko artistarik onenak bilatzen dituen Rockein lehiaketaren 12. edizioa martxan da eta Galdakaoko eta Usansoloko artistek parte hartu ahal izango dute, tokiko artistarik onenaren kategorian. Gaur, uztailak 11, da lehiaketan izena emateko azken eguna.
Hego Euskal Herriko artistei zuzendutako Rockein musika lehiaketaren hamabigarren edizioa antolatuko du Basauriko Udalak. Izena emateko epea emateko epea zabalik dago eta gaur, uztailak 11, da azken eguna.
Jasotako proposamen guztien artean, sektoreko profesionalek osatutako epaimahai batek sei finalista aukeratuko ditu, eta Basauriko Social Antzokian arituko dira azaroaren 16an, zapatuz. Gau horretan bertan erabakiko eta jakinaraziko du epaimahaiak zeintzuk izango diren 2024ko edizioko talde irabazleak.
Guztira lau kategoriatan banatuko ditu Rockein jaialdiak sariak, tartean tokiko artistarik onenari. Aurten kategoria hau Hego Uribe eskualde osoko musika proposamenetara zabaldu da eta Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako pertsona bat gutxienez duten taldeek edo bakarlariek kategoria horretako saria eskuratu ahal izango dute.
Hauek dira lehiaketan parte hartzeko baldintzak:
- Euskal Autonomia Erkidegoan (EAE) edo Nafarroan jaiotako edo bertan bizi den taldekide bat izatea, gutxienez
- Tokiko banda onenaren saria eskuratu ahal izateko: Basaurin, Arrigorriagan, Etxebarrin, Galdakaon, Ugao-Miraballesen, Usansolon edo Zaratamon erroldatutako taldekide bat izatea, gutxienez
- Eskarabilera saria eskuratu ahal izateko: taldeko kideen %50a gutxienez emakumeak izatea
- Taldekideak 16 urtetik gorakoak izatea
- Izena emateko unean ez izatea disko bat baino gehiago argitaratuta, kontratu diskografiko bati lotuta dagoen edo ez kontuan hartu gabe
- Abestiak originalak izatea
- Musika-estilo guztiak onartzen dira
- Aurretik Rockeinen izena emandako talde guztiek edizio berri honetan parte hartzeko aukera dute, baldin eta aurrez aipatutako baldintzak betetzen badituzte. Dagoeneko irabazle izan diren taldeek ez dute sarituak izan ziren kategoria berean errepikatzeko aukerarik izango
Eta jokoan dauden sariak aldiz, hauek:
-Artista irabazlea:
EP profesional bat (gutxienez bost abesti) grabatzea Bilboko El Tigre estudioetan
Bideoklip profesional bat grabatzea
Kontzertua MAZ Basauri festibalean
-Tokiko artistarik onena:
Bideoklip profesional bat grabatzea
Kontzertua MAZ Basauri festibalean
-Euskarazko artistarik onena:
Kontzertua MAZ Basauri festibalean
-Eskarabilera saria:
Kontzertua MAZ Basauri festibalean