Aparkalekuen falta da galdakoztarren arazorik nagusiena
TESTUA: Irati Alonso García
ARGAZKIA: Google Maps
Aztikerrek Galdakaoko Udalaren eskariz egindako inkestaren arabera, aparkalekuen falta da galdakoztarren arazorik nagusiena. Mugikortasun arazoak eta garraio publiko gabeziak ere aipatu dituzte herritarrek, eta baita etxebizitzarekin lotutako arazoak ere. Hemen batu ditugu inkestaren emaitzak.
Galdakoztarren kezkak eta herrian egiten ari diren lanen inguruan duten iritzia ezagutzeko asmoz, inkesta egin du Aztikerrek, Galdakaoko Udalaren eskariz. Enpresak 378 herritarrei telefonoz zein online egindako galderen bidez osatu du lana.
Besteak beste, Galdakaoko politikarien inguruan galdetu diete herritarrei, eta Iñigo Hernando izan da baloratuena 7,6ko puntuazioarekin, BINKEk jaso duen moduan.
Galdakaok duen egoera baloratu dute ere herritarrek eta gehienak pozik daude herriarekin bizitzeko leku moduan. Inkestatuen %20,3k 10 eta 9 arteko balorazioa eman diote, %62,2k 8 eta 7 artekoa. Batez beste, 7,5eko puntuazioa eman diote herriari.
Bestalde, herriko arazo nagusien inguruez galdetu diete galdakoztarrei eta izendatuena aparkaleku falta izan da, %27,4k aipatu baitu. Ondoren mugikortasun arazoek eta garraio publiko gabeziak kezkatzen dituzte herritarrak —%17,5— eta etxebizitza aipatu dute ondoren—%11,3k—. Segurtasun falta —%5,8— aisialdirako guneen babesa —%4,8— eta kaleen garbitasuna —%3,9— gaiak ere aipatu dituzte herritarrek.
Kezka pertsonal nagusiei dagokienez ere, aparkaleku falta aipatu dute %18,9k. Etxebizitzarekin lotutako arazoak %12,6k izendatu dute eta garraio publikoa eta mugikortasun arazoak %12,3k.
Udal proiektuen inguruan duten iritzia ere galdetu diete herritarrei inkestan eta ibaiertza aisialdirako gune gisa indartzeari eta merkataritzako dirulaguntzak zabaltzeari eman diote herritarrek garrantzi handiena —batez beste, 8,4 puntu bakoitzari—.
Kirol instalazio berriak sortzeari eta herri inklusiboagoa eraikitzeari ere 8,3ko eta 8,2ko puntuazioa eman diote, hurrenez hurren. Lehentasunak ezartzerakoan, hala ere, herri inklusiboagoa egitea eta kirol instalazio berriak eraikitzea izan dira gai aipatuenak.
Aztikerrek egindako inkestaren bestelako datu eta ondorioak argitaratzen joango da BINKE datozen egunotan. Bitartean, hemen deskargatu daiteke txostena osorik.
