Euskal Eskola Publikoaren Jaian parte hartu zuten atzo 18 familia galdakoztarrek
TESTUA: Irati Alonso García
ARGAZKIA: Urreta Eskolako IGE
Euskal Eskola Publikoaren Jaiaren 32. edizioa ospatu zen atzo Urduñan eta milaka pertsona batu zituen ospakizunak. Parte-hartzaileen artean 18 familia galdakoztar izan ziren.
Atzo, ekainak 1, Euskal Eskola Publikoaren Jaiaren 32. edizioa ospatu zen Urduñan, «Lurra, herria, eskola errotu» lelopean. Euskal Eskola Publikoaz Harro plataformak eskola publikoa hezkuntza sistemaren erdian jartzeko eskatu zuen hitzorduan, eta euren ahotsa gehiago entzun behar dela azpimarratu zuen.
Aldarrikapen eta jai giro honetan, milaka lagunek parte-hartu zuten Urduñan antolatutako jaian, haien artean 18 familia galdakoztar.
Urreta eta Gandasegi eskoletako guraso elkarteek antolatutako autobus batean joan ziren, eta jaiaz gozatu zuten, «eskola publikoa bidea delako».
