Galdakaoko bilketa pneumatikoko langileek beste hilabete batez luzatuko dute greba
TESTUA: Irati Alonso García
ARGAZKIA: ELA sindikatua
ELA sindikatuak ezagutzera eman duenez, Galdakaoko bilketa pneumatikoko langileek beste hilabete batez luzatuko dute greba. Grebaren helburua hitzarmen kolektibo propioa lortzea da, lan baldintzetan hobekuntzak lortzeko.
Lan baldintzak hobetzeko helburuarekin, hitzarmen propio bat negoziatu nahi dute bilketa pneumatikoko sistemaren bidez hondakinak biltzen dituen Envac Iberia SA enpresako langileek, eta horretarako hilabete bateko greba egin dute, ELA sindikatuak deituta.
Orain, greba beste hilabete batez luzatuko dutela ezagutzera eman du sindikatuak. Apirilaren 12tik maiatzaren 11ra izango da, eta zentroetarako zerbitzuak ematen dituen kolektibo osoari eragingo dio: Galdakao, Erandio, Laudio, Donostia eta Barakaldoko lantokiak, eta zentro horietan zerbitzuak ematen dituzten langile guztiei.
«Grebaren helburua hitzarmen kolektibo propioa lortzea da; hobekuntzak prebentzioaren arloan; hobekuntzak aparteko orduen eta lanbide-sailkapenaren arloan; egonkortasuna, kolektiboaren prekarietatearekin amaitzeko enplegu-politikak bultzatuz; eta hobekuntza orokorrak enpresaren enplegu-politikan», azaldu dute sindikatutik.
