Espainiako Poliziak speed kopuru handiak trafikatzen zituen talde kriminal bat desegin du, eta bost pertsona atxilotu ditu Bizkaian. Operazioan Galdakaoko eta Bilboko lau etxebizitzatan zortzi kilo speed, kokaina eta haxix aurkitu dituzte.
Speed kantitate handien trafikoan ziharduen talde kriminal bateko ustezko bost kide atxilotu dituzte Bizkaiko hainbat herritan, ia 300 kilo anfetamina sulfatoko kargamentu bat entregatzen saiatzen ari zirela.
Espainiako Polizia Nazionalak ezagutzera eman duenez, narkotrafikoaren eta krimen antolatuaren aurkako operazioa joan den hilabetean egin zuten, Mungian 287 kilo anfetamina sulfatoren —speed izenez ezagutzen dena— kargamentu bat atzeman zutenean.
Esku-hartze horretan, Operazio Talde Bereziaren (GEO) laguntzarekin, hiru pertsona atxilotu zituzten. Ondoren, Bilbon eta Galdakaon lau etxebizitzetan sartzeko eta miatzeko eskatu zioten epaileari.
Bertan, beste 6,5 kilogramo speed, 300 gramo kokaina eta 700 gramo haxix aurkitu zituzten saltzeko prest, baita hainbat euro eta dolar amerikar ere.
Egun bat geroago, drogen garraioarekin zerikusia zuten beste bi pertsona aurkitu eta atxilotu zituzten. Orain arte, ikertutako zortzi ondasun higiezin blokeatu dira prebentzioz, eta banku-kontu guztiak blokeatu dira.
