Galdakaoko EAJk Santakurtzak ospatzeko gune batzuetan Ertzaintzaren kontrako kartelak agertu izana salatu du. Jeltzaleen esanetan, «jarrera sektario eta baztertzaile horrek ez ditu galdakoztar gehienak ordezkatzen».
Santakurtzak hastear direnean, jai guneetan Ertzaintzaren aurkako kartelak eta mezuak agertu direla salatu du Galdakaoko EAJ-PNVk sare sozialen bitartez.
Jeltzaleek adierazi dutenez, «jarrera sektario eta baztertzaile horrek ez ditu galdakoztar gehienak ordezkatzen».
«Ertzainak guztien segurtasuna eta bizikidetza bermatzeko daude, ez txosna-esparrura nor sar daitekeen eta nor ez erabakitzeko eskubidea dutela uste dutenek seinalatzeko. Nortzuk dira Galdakaoko jaietan nork parte hartu dezakeen edo ez erabakitzeko?», adierazi dute.
Halaber, «zigorgabetasun hori onartzen dutenen isiltasuna» arbuiatu dute: «Jaietan errespetua, askatasuna eta bizikidetza egokitzen dira».
