Herritarren jardueretarako erabil daitezkeen udal jabetzako lokal, espazio eta eraikinen inbentarioa egitea eskatu dio Galdakaoko PSE-EEk Udalari. Sozialisten arabera, «duela urtebete baino gehiago onartutako Parte-hartze Ordenantza bete behar da» gai honetan.
Galdakaoko PSE-EEk mozioa aurkeztuko du hilabete honetako udal osoko bilkuran «duela urtebete baino gehiago onartutako Parte-hartze Ordenantza betetzeko».
Zehazki, ordenantza honetan zehaztutako honakoa betetzea eskatuko du: herritarren jardueretarako erabil daitezkeen udal jabetzako lokal, espazio eta eraikinen inbentarioa egitea.
Zerrenda horretan honako hauek jasotzea aldarrikatuko dute sozialistek: espazio horietatik zeintzuk dauden lagata edo laga daitezkeen iraupen jakin baterako, eta zeintzuk momentu puntual baterako, bereizketa hori zehazten duten irizpideak eta baldintzak argituz; eta espazio bakoitzerako, Ordenantzan jasotakoaz gain, horien ezaugarriak, erabilgarritasuna, eskura dauden baliabideak, ekitaldi edo jardueren tipologia adierazi.
«Zerrendari titulartasun publikokoak izan arren oraindik erabiltzeko behar bezala egokituta ez dauden lokalak eranstea» eskatuko du Victor Trimiño Galdakaoko PSE-EEren bozeramaileak, «arrazoiak azalduz, eta udalerriko auzoetan banaketari dagokionez dauden baliabideen azterketa egitea, gabezia gehien dituzten auzoak zeintzuk diren baloratzeko».
«Ordenantzan bertan jasotzen den urteko konpromiso baten ez-betetze nabarmena» salatzeaz gain, ordezkari sozialistak gaineratu du «aldarrikapen hori bat datorrela talde politiko, erakunde eta bizilagunen artean partekatutako diagnostiko batekin: Galdakaon erabilera komunitariorako espazio eta lokal publiko gehiagoren beharra».
«Eskuragarri dauden baliabideei buruzko informazio zehatza duen inbentario batek gaur egun eskuragarri dauden lokalen eta baliabideen errealitatea argituko luke, diagnostiko zehatza egin ahal izateko eta egoera hobetzeko eta antzemandako beharrei aurre egiteko politika egokiak egin ahal izateko», nabarmendu du Trimiñok.
