Galdakaoko Udalak uraren hornidura sarea hobetzeko proiektua hasiko du bihar, urtarrilak 12. Obrek hamar hilabete inguruko iraupena izango dute, eta Juan Bautista Uriarte kaletik Maximo Moreno Musika Eskolaraino doan tartean egingo dira.
Herritar guztiei zerbitzu «fidagarriagoa eta eraginkorragoa» bermatzeko helburuarekin, Galdakaoko Udalak uraren hornidura sarea hobetuko du.
Bihar, urtarrilak 12, hasiko dira obrak eta hamar hilabete inguruko iraupena izango dute. Zehazki, Juan Bautista Uriarte kaletik Maximo Moreno Musika Eskolaraino doan tartean egingo dira.
Proiektua fasetan gauzatuko da. Lehenengoa eta bigarrena jarraian egingo dira, eta Udaltzaingoaren komisariaren eta Ardantza parkearen arteko tarteari eragingo diete.
Lehenengo faseko lanak egiteko beharrezkoa izango da obrako materialak biltzeko gunea prestatzea, baita komunak eta aldagelak jartzea ere. Gune hori udaletxearen parean dagoen txandakako aparkalekuan kokatuko da, eta 17 aparkaleku erabiliko dira —heren bat inguru—.
Horrez gain, obrak aurrera eramateko Plazakoetxerako noranzkoan doan eskuineko erraileko zorua altxatu beharko da. Hori dela eta, zirkulazioa ezkerreko errailetik egingo da, semaforo bidez araututa egongo den txandakako pasabide sistemaren bidez, langileen eta erabiltzaileen segurtasuna bermatzeko.
Proiektu honen bidez, sareko zatirik zaharrenen berritze integrala egingo du Udalak, eta hoditeria zaharkitua «material modernoago eta iraunkorragoekin» ordezkatuko da. Horri esker, «ura hornitzeko sistemaren funtzionamendua hobetuko da eta zerbitzuaren gorabeherak nabarmen murriztuko dira».
Udalak lanen jarraipen etengabea egingo du, eta horien bilakaeraren, faseen eta sor daitezkeen eraginen berri emango du, «eragozpenak ahalik eta gehien murrizteko».
