Galdakaon 961 bizitoki daude hutsik eta 842 herritarrek egin dute etxebizitza eskaera
TESTUA: Irati Alonso García
ARGAZKIA: Galdakaoko Udala
Galdakaoko Udalaren esanetan, gutxienez 961 bizitoki daude hutsik herrian eta 842 galdakoztarrek dute izena emanda Etxebiden, bizitoki bat alokatu edo erosi nahi dutelako. Datu hauen aurrean, «galdakoztarrek bizi proiektua herrian egin ahal izateko» plana aurkeztu du Udalak.
Galdakaoko Udalak apirilaren 2an aurkeztu zuen hurrengo hiru urteetarako etxebizitza plana, «galdakoztarrek bizi proiektua herrian egin ahal izateko». Ibarluzeko bizitokietan egindako agerraldian iragarri zuen, eta honetan Iñigo Hernando alkateak adierazi zuenez, gutxienez 961 bizitoki daude ofizialki hutsik herrian, hau da, inor erroldatuta ez dutenak.
Aldi berean, alkateak nabarmendu zuen 842 galdakoztarrek izena emanda dutela Etxebiden, 662 pertsonek etxe bat alokatzeko eta 140k erosteko. «Datu hauek kontuan izanda, uste dugu instituzioek eta norbanakoek ardura hartu behar dugula etxebizitzaren merkatua lasaitzeko», azpimarratu zuen.
Udal Gobernuak bere aldetik, lau ildo nagusi dituen etxebizitza plana garatuko duela azaldu zuen. BINKEk jaso zuen moduan, plan honek zenbait ekintza zehatz batzen ditu, hala nola, hutsik daude etxeak alokairuan jartzeko eta etxebizitza parke publikoa handitzeko neurriak.
