Haatik Dantza konpainiak ‘OTS’ ikuskizuna eskainiko du Galdakaon, domekan

TESTUA: Irati Alonso García
ARGAZKIA: Haatik Dantza

Domekan, maiatzak 11, Haatik Dantza konpainiak ‘OTS’ ikuskizuna eskainiko du Torrezabal Kultur Etxean. Lan hau Herri Gogoa Euskal Herriko lehen zigilu diskografikoan islatutako mugimendu kultural abangoardistaren berrinterpretazioa da.

Torrezabal Kultur Etxeak ekainera bitarte eskainiko duen egitarauarekin jarraitzen du eta domekan, maiatzak 11, Haatik Dantza konpainiaren ‘OTS’ ikuskizuna hartuko du, 19:00etan. Jone San Martínen eta Iurre Aranbururen zuzendaritzapean, Jon Arsuaga, Libe Sukia, Nagore Zabala, Iñigo Etxeberria, Leire Romero, Itzel Vela eta Aiert Beobide igoko dira oholtzara.

Ikuskizuna Herri Gogoa Euskal Herriko lehen zigilu diskografikoan islatutako mugimendu kultural abangoardistaren berrinterpretazioa da. Zentsura zela eta zigilu hori inoiz ofizialki existitu ez bazen ere, berrehun diskotik gora argitaratzea lortu zuen, euskal kultura biziberritu eta berritzeko helburuarekin.

«’OTS’ dantza garaikideko lan soil bat baino gehiago da. Koreografiak, oroitzapenak asetzea, harritzea, gogora ekartzea eta, batez ere, mugimendu hark herri kontzientzia bultzatzeko eta artea herriari hurbiltzeko izan zuen beharra transmititzea baitu helburutzat. Beste legatu baten gainean eraikitako ondarea», adierazi dute Galdakaoko Udaletik.

Saioak eskuragai daude ohiko webgunean 7,5 eta 10 euro arteko prezioan.