Ikasle galdakoztarrek ingurumenaren arloan egindako lanak aurkeztu zizkioten alkateari
TESTUA: Irati Alonso García
ARGAZKIA: Galdakaoko Udala
Ingurumenaren Nazioarteko Eguna ospatu zen ekainaren 5ean eta honen harira, Eskola Agenda 2030 egitasmoan parte hartzen duten herriko ikastetxeetako ikasleei harrera egin zien Galdakaoko Udalak. Ikasleek ikasturtean zehar gai honen inguruan egindako lanketa aurkeztu zieten udal ordezkariei.
Ekainaren 5ean Ingurumenaren Nazioarteko Eguna ospatu zen eta data aprobetxatuz, Galdakaoko Udalak Eskola Agenda 2030 egitasmoan parte hartzen duten herriko ikastetxeetako ikasleei harrera egin zien.
Ikasleak udaletxeko osoko bilkuren aretoan bildu ziren Iñigo Hernando alkatearekin eta Ainara Tellaetxe Ingurumen teknikariarekin eta saioan ikasturtean zehar ingurumenaren arloan egindako lanketak aurkeztu zizkieten.
Ekintzen hauen artean, honako hauek aurkeztu zizkieten: baratze ekologikoa landatzea, egurrezko bankuei bigarren bizitza ematea edo natura bisitatzea; konpromisoen alorrean, berriz, ikastetxeetan hegaztientzako habiak jartzeko, sentsibilizazio kanpainak egiteko, plastiko gutxiago erabiltzeko eta gehiago birziklatzeko konpromisoa hartu dute gazteek, adibidez.
«Oso garrantzitsua da gazteen ikuspuntua eta iritzia ezagutzea, beste ohitura batzuk baitituzte, kasu honetan hobeak», ziurtatu zuen Hernandok: «Horiek ezinbestekoak dira gainerako pertsonengan klik egiteko».
Tellaetxeren esanetan, «sentsibilizazio hori gainerako herritarrei helaraztea beharrezkoa da», eta Udala bide hori gidatzeko etengabeko lana egiten ari da.
