Itziar Atienza galdakoztarra, ‘Desagertuta’ telesail berrian aktore

TESTUA: Irati Alonso García
ARGAZKIA: EITB

‘Desagertuta’ telesail berria astelehenean estreinatu zen euskarazko produkzioak biltzen dituen Primeran plataforman. Hainbat aktore ezagun ikusi daiteke telesailean, haien artean Itziar Atienza galdakoztarra.

Primeran plataforman ikusgai dago honezkero ‘Desagertuta’ telesail berria, astelehenean aurrestreinaldia egin ostean Donostiako Victoria Eugenia Antzokian. Gazteei zuzendutako eta euskaraz grabatutako fikziozko serieen ekoizpena bultzatzeko EITBk 2023an egindako deialdiaren lehen emaitza da telesail hau.

Jon gaztearen desagerpen misteriotsua du oinarri telesailak eta hainbat aktore ezagun ikusi daitezke honetan, besteak beste, Gorka Otxoa, Ane Rot, Jon Olivares eta baita Itziar Atienza galdakoztarra ere. Atienzak Maite Zabala inspektorearen papera egiten du produkzio honetan.

Filmatze estrategia berritzailea erabiltzen aitzindaria izan da telesail hau, izan ere, euskaraz eta gaztelaniaz aldi berean filmatutako lehena da. Birritan grabatu dituzte eszena guztiak, hizkuntza bi-bietan «esperientzia bakarra» izan dadin.

Guztira zortzi atal ditu ‘Desagertuta’ telesailak eta lehenengo biak ikusgai daude Primeran plataforman.