Marije Gonzalez Aperribaiko anbulatorioko langilea omendu zuten auzokideek
TESTUA: Irati Alonso García
ARGAZKIA: Susana Viteri
Aperribaiko anbulatorioko harreran hogeita hamar urte baino gehiago eman ditu Marije Gonzalezek eta aste hau izango da bere azken lan astea, jubilatu aurretik. «Egindako lan guztia eta honetan jarritako maitasuna» eskertzeko helburuz, omenaldia egin zioten hirurogei auzokide inguruk astelehenean.
Aperribaiko anbulatorioan sartu eta ikusi daitekeen lehen pertsonetakoa da Marije Gonzalez (argazkian erdian), 33 urtetan zehar harreran izan den langilea. Bizitza oso bat anbulatorioan eman ostean ordea, laster jubilatuko da eta hau da bere azken lan astea.
Auzoan oso maitatua den langilea da Gonzalez, «auzokideekin eta familiekin izan duen maitasunagatik batez ere». «Hau anbulatorio txikia da eta langile gehienak ezagutzen gaituzte. Marijek beti erraztu dizkigu egin beharreko tramite guztiak eta asko inplikatu da gure familiekin», adierazi du Susana Viteri auzokideak. «Gure semeak hazten ikusi ditu, gure nagusiak zaintzen lagundu digu…», nabarmendu du.
Horregatik, omenaldia egin zioten astelehenen eguerdian anbulatorioan bertan. Hitzorduan hirurogei lagun inguru batu ziren eta hainbat opari egin zizkioten: loreak, kakorratz-lanez egindako panpina, grabatutako egurrezko uztaia… Halaber, Olabarrietako dantza taldeko kideek aurreskua dantzatu zuten bere omenez.
Viteriren hitzetan, Marije «oso emozionatuta» egon zen omenaldian zehar, ez zuelako espero: «Oso polita izan zen eta etorri ahal izan zen jendearen mezuak ere helarazi genizkion. Faltan botako dugu».
