Mikel Bizarren ‘Su beltzaren egunsentia’ obra inklusiboa Galdakaon estreinatuko da
TESTUA: Irati Alonso García
ARGAZKIA: Kulturklik
Down Sindromea, Autismo Espektroko Nahastea eta osasun mentala ikusaraztea helburu duen ‘Su beltzaren egunsentia’ obra inklusiboa hartuko du Torrezabal Kultur Etxeak domekan, ekainak 15. Idi Bihotz taldean aritutako Mikel Bizarrek sortutako lana da eta ‘Laino zoragarri hori’ trilogiaren bigarren zatia.
Musikaren, literaturaren, dantzaren eta zinemaren bidez Down Sindromea, Autismo Espektroko Nahasmena eta osasun mentala ikusaraztea eta horiei buruz kontzientziatzea helburu duen lana da ‘Su beltzaren egunsentia’, ‘Laino zoragarri hori’ trilogiaren bigarren zatia.
Mikel Bizar abeslari, konpositore eta idazle bilbotarrak sortu du proiektua, «berdintasunean eta aniztasunean heztea da, pertsonen beharretara egokitutako laneratzearen eta gizarteratzearen alde eginez». Benetako gertakarietan oinarritutako lana da, eta, besteak beste, inklusioari, aniztasunari, kiroleko balioei eta Alzheimerrari lotutako gaiak jorratzen ditu.
Gai hauen inguruan kontzientziatzeko helburuz hain zuzen, Galdakaoko Torrezabal Kultur Etxean estreinatuko dute ‘Su beltzaren egunsentia’ domekan, ekainak 15. Saioa 12:30ean izango da eta honetan musika klasikoa, rocka, dantza klasikoa eta garaikidea uztartuko dira. Biarte Akademiako eta Euskal Herriko Down Sindromearen Fundazioko neska-mutilek osatzen duten Fun Up konpainia inklusiboak interpretatuko du lana.
Saiorako sarrerak salgai daude Galdakoko Udalaren webgunean eta Torrezabal Kultur Etxean, eta Udalak «galdakoztarrak animatzen ditu zuzeneko musika, dantza inklusiboa eta zinema uztartzen dituen ikuskizun honetara joan daitezen, baita aurreiritziak alde batera utzi eta balio inklusiboak sustatu ditzaten ere».
