Musika eskola aurreko gunean estalkia jartzeko lanak hasi dira

TESTUA: Irati Alonso García
ARGAZKIA: Galdakaoko Udala

Galdakaoko Udalak musika eskola aurreko gunean estalkia jartzeko lanak hasi ditu. Ondoren, aulkiak, lorontziak eta argia gehitu, eta plaza itxura emango zaio eremuari.

Urteetan auzokideek eta musika eskolako erabiltzaileek egindako eskaerak aintzat hartuta, estalkia jarriko du Galdakaoko Udalak musika eskolaren aurrean. Aulkiak, lorontziak eta argia gehituko dira gero, eta plaza itxura atsegina emango diote.

Estalki zati horien konposizioa apirilean landu, eta maiatzerako prest egongo dela aurreikusten da. Zimentazio eta kanalizazio lanak hasi dira honezkero, eta, aterpeen piezak lantegian bertan muntatuko direnez, arin joango dira lanak.

Aste Santuko jaiegunen ondoren, maiatzean amaituta egongo direla espero da. Gero ekingo zaie beste lanei. Guneari plaza itxura emateko bankuak, lorontziak eta landareak jarriko zaizkio, baita argiteria ere.

Duela ia bost urte itxura berria hartu zuen Galdakaoko musika eskolaren inguruak. Lehenengo, N-634 errepidea alderik alde airetik zeharkatzen zuen igarobidea kendu zen, mugikortasun arazoak eta arriskuak ezabatzeko.

«Argitasunean irabazi zuen horrela eremuak, eta espazio berri baterako aukera sortu zen. Jarraian, musika eskolaren eraikin osoa hartzen duen mural erraldoia egin zuten enplegu planetako langileek eta izaera berezia eman zion horrek guneari: kolorea eta freskotasuna. Joan-etorri askoko gunea izanik, informazio panela eta kale liburutegia ere jarri ziren inguruan, oso harrera ona izan zutenak», azaldu dute Udaletik.