Selektibitatean Bizkaiko onenetakoak: June Dieguez eta Uxue Valle galdakoztarrak
TESTUA: Irati Alonso García
ARGAZKIA: BINKEri bidalitakoa
Ekainaren 3tik 5era unibertsitatera sartzeko hautaproba egin zuten Euskal Autonomia Erkidegoko ikasleek eta Bizkaiko emaitza onenetakoak galdakoztar bik lortu dituzte: June Dieguezek eta Uxue Vallek. Baina, ze nota atera dute biek? Harrituko zara!
Unibertsitatera sartzeko hautaproba egin zuten Euskal Autonomia Erkidegoko 12.297 ikaslek ekainaren 3tik 5era. Euskal Herriko Unibertsitateak emandako datuen arabera, %96,73ak gainditu du proba eta bataz besteko nota 6,7koa izan da.
Emaitza hori asko hobetu dute ordea June Dieguez eta Uxue Valle galdakoztarrek. Lagunak eta Elexalde institutuko ikasleak biak, selektibitatean Bizkaiko onenetakoak izan dira.
Dieguezek 9,81ko nota lortu zuen azterketaren fase orokorrean —Bizkaiko onena— eta Batxilergoan eskuratutako emaitza onei esker 13,45ko kalifikazioa eskuratu du guztira. Vallek aldiz, 9,7ko nota izan zuen fase orokorrean eta guztira 13,88 da bere kalifikazioa, Batxilergoan 10eko bataz bestekoa izan baitu.
Notak espero baino lehen jarri zituzten ikusgai eta kalean elkarrekin zeuden arren, emaitzak ezagutzeko bakoitza bere etxera etxera joatea erabaki zuten, «tentsio handiko momentua zelako». «Bioi berdina gertatu zitzaigun. Sentsazio onekin atera ginen azterketetatik baina ez genuen hain nota ona espero. Urduritasun handiko momentua izan zen notak jasotzekoa baina gero lasaitasun handia sentitu genuen», aitortu dio Vallek BINKEri.
Azterketa zailenak biologia eta matematika izan dira gaztearentzat, azken hau aurten izan dituen berrikuntzen ondorioz batez ere: «Guk landutako aurreko urteetako ereduetan zuzenean galdetzen zuten eta aurten ordea zeharka egiten zituzten galderak». Errazenak ordea, euskara eta ingelesa izan dira Elexalde institutuko ikasleentzat.
Emaitza bikain hauekin, etorkizunera begira daude honezkero gazte galdakoztarrak. Dieguezek Medikuntza ikasi nahi du eta Vallek aldiz, Ingenieritza Biomedikoa, eta «sartzea espero dugu».
Aurretik ordea, disfrutatzeko tartea izango dute udan. Malagara joango dira ekainaren amaieran beste hiru lagunekin batera: «Gogo handiekin gaude urte gogor honen ostean».
