Tigre-eltxoaren agerpena eta ziztada prebenitzeko neurriak hartzea gomendatu du Galdakaoko Udalak
TESTUA: Irati Alonso García
ARGAZKIA: EITB
Klima aldaketak eta globalizazioak tigre-eltxoaren hedapena eragin dute azken urteotan eta honen agerpena eta ziztada prebenitzeko neurriak hartzea gomendatu du Galdakaoko Udalak. Ezagutu hemen gomendio guztien zerrenda.
Asiako hego ekialdean jatorria duen eltxo espezie inbaditzailea da tigre-eltxoa eta klima aldaketak eta globalizazioak espezie honen hedapena eragin dute azken urteotan. Osasun Publikoko arazotzat hartzen da hau, gaixotasun biriko larriak transmititzeko gai baita.
Horregatik, Galdakaoko Udalak, Eusko Jaurlaritzarekin elkarlanean, tigre-eltxoaren hedapena eta ziztada saihesteko zer neurri hartu behar diren gogorarazi nahi die herritarrei.
Zer egin zabaldu ez dadin?
Eltxo guztiek bezala, tigre eltxoak ura behar du larba faseak garatzeko. Nahiago du ur geldiko gorputz txikietan ugaldu, esaterako, ontzietan, pneumatikoetan, loreontzietan edo bidoietan. Beraz, ur pilaketak saihestu behar dira, honako gomendio hauek kontuan hartuta:
- Astean behin ura pilatzen duten kanpoko ontziak hustea: loreontzien platerak, pitxerrak, kuboak, jostailuak, plastikozko igerilekuak, eta abar
- 2 edo 3 egunean behin, maskoten edontzietako ura berritzea
- Hustubideetan ura astean behin gutxienez botatzea, geldialdia saihesteko
- Urbanizazioetan, familia bakarreko etxeetan etab. drainatze uretako eremuetan (kainu zuloak eta estoldak) eta teilatu hodietan ur pilaketak saihestea
- Leihoetan, ateetan eta beste irekidura batzuetan eltxo sareak erabiltzea, eltxoa etxean sar ez dadin
Nola saihestu tigre eltxoaren ziztada?
Eltxo horiek egunez daude aktibo eta, beraz, normalean egunean zehar ziztatzen dute, eltxo autoktonoek ez bezala. Gainera, behin baino gehiagotan gauez ziztatzen dute. Hori saihesteko, jarraibide hauek jarraitzea komeni da:
- Mahuka luzeko arropa, praka luzeak eta oinetako itxiak janztea
- Baimendutako uxatzaileak erabiltzea, adibidez DEET, IR3535 edo picaridina (fabrikatzailearen gomendioei jarraitu behar zaie, eta saihestu egin behar da mukosak, betazalak, ezpainak, zauriak, larruazal sentikorra edo errea ukitzea)
- Umeen eta emakume haurdunen kasuan, neurri fisikoak lehenetsi behar dira
Bestalde, arriskugune batera bidaiatu duen pertsona batek bere burua babesteko neurriak zorroztu beharko ditu eltxoen ziztadak saihesteko bueltatu eta hurrengo 15 egunetan. Gainera, sintomak agertzen badira (batez ere sukarra, minaren zantzuak, ondoeza…), berehala kontsultatu beharko da dagokion osasun zentroarekin harremanetan jarrita.
Gogoan izan behar da tigre eltxoek jaio diren tokitik metro batzuetara baino ez dutela hegan egiten; beraz, ziztadarik izanez gero, litekeena da haztegi bat hurbil izatea. Tigre eltxoaren banaketa ezagutzen laguntzeko, herritarrek parte hartzeko plataforma bat sortu da, osasun agintariei erabakiak hartzen eta kontrol estrategia eraginkorragoak ezartzen laguntzeko.
