Usansolon antolatuko den Euskal Herriko Joaldunen Festako egitaraua argitaratu dute

TESTUA: Irati Alonso García
ARGAZKIA: Mathieu Mengaillou

Urtero antolatu ohi den Euskal Herriko Joaldunen Festa Usansolon izango da aurten. Maiatzaren 31n antolatuko du Oinarin Dantza Taldeak eta hemen batu dugu egitarau osoa.

Euren festa ospatu ohi dute urtero Euskal Herri osoko joaldunek. Iaz Zumaian izan zen eta 123 joaldun batu ziren ospakizunean, haien artean Oinarin Dantza Talde usansolotarreko hamar.

Aurten ordea, antolakuntza lanetan izango dira Oinarinekoak, izan ere, Usansolon izango da Euskal Herriko Joaldunen Jaia maiatzaren 31n, talde usansolotarraren eskutik, BINKEk aurreratu zuen moduan.

Taldetik azaldu dutenez, «festa handia izango da eta denbora luzea daramate Euskal Herriko Joaldunen Biltzarretik egun hau antolatzen». Egitaraua egun osokoa izango da, eta ekintza hauek batuko ditu:

11:45 Joaldunen kalejira
13:15 Poteo musikatua
15:00 Bazkaria Jon Maia eta Unai Iturriaga bertsolariekin
19:00 Mugi Panderoa erromeria+Larrain Dantza
21:00 Tri Dj