Xabier Aranguren: «Genevak aniztasun handia du, baina nortasun apur bat falta zaio»
Xabier Aranguren, Genevako galdakoztarra
BINKE / 2025eko otsaila
Jaiotzez: Galdakao.
Gaur egun: Genevan, Suitzan.
Jaiotza urtea: 1978.
Ikasketak: Irakaskuntza eta FP2.
Zertan dabil: Irakasle lanetan.
Zeintzuk dira bizi izan dituzun aldaketarik nabarmenenak? Aldaketa asko izan dira baina handiena Genevako biztanleriari ohitzea izan zen. Genevan biztanleriaren erdia baino gehiago atzerritarra da. Hasieran horretara ohitzea zaila izan zen, baina aldi berean esperientzia aberasgarria. Gaur egun, lurralde ugaritako lagunak ditut: Tailandia, Txina, Brasil, Mexiko edo Japoniakoak. 18 urte hauetan munduko bazter askotako jendea ezagutzeko aukera izan dut. Beste aldaketa handietako bat ordutegiena izan zen. 12:00etan edo baita 11:30ean bazkaltzea, 18:30ean afaltzea… ai ama!
Zer du zure hango herriak, Galdakaok ez duena? Orografiari dagokionez, antzekotasun handiak daude eta oso politak eta menditsuak dira biak. Mendia izugarri gustatzen zait, eta hemen mendiek Galdakaokoak baino altuera handiagoa dute eta agian, bakarrik agian, politagoak dira. Hemen Genevan aldiz, itsasorik ez dago, baina laku polita eta handia du. Hala ere, itsasoa asko faltan botatzen dut eta hori Galdakaotik gertu neukan.
Eta alderantziz? Galdakaon askoz hobeto jaten da, eta Genevarekin konparazioa ez litzateke bidezkoa! Lehen esan dudan moduan, hemen aniztasun kulturala izugarria da. Galdakaon ere gero eta handiagoa da, baina ez Genevako mailan. Laburbilduz, Genevak kultura-aniztasun handia du, baina nortasun apur bat falta zaio. Galdakao, aldiz, aniztasun txikiagoa izan arren, nire ustez herri nortasun sendoagoa dauka
Zeren falta somatzen duzu han? Kuadrilla eta familia ordezkaezinak dira. Euskal janaria ere faltan botatzen dut eta baita jaiak ere: San Tomasak, Santakurtzak…
Zer gomendatuko zenioke zure herritar bati, han bisitatzeko? Batez ere frantsesa ikastea eta hiriko kulturan ahalik eta gehien murgiltzea. Ingelesez aritzea ere oso garrantzitzua da. Nik, nire lanagatik, alemaneraz ere ikasi behar izan dut. Hiri interesgarria da, baina oso internazionala denez, bertako jendearekin nahastea gomendagarria da benetako suitzar kutsua sentitzeko. Mendira joatea ere gomendatuko nuke. Genevatik gertu Alpeak daude eta zoragarriak dira.
Gure herriaz hitz egiten badiezu hangoei, zeren inguruan aritzen zara bereziki? Batik bat, euskal nortasun kulturala, natura, janaria eta ohiturak aipatzen dizkiet.
Zer dakite gure herriaz? Batzuek Euskal Herria non dagoen ez dakite, eta beste batzuek, berriz, gure historiaren berri jaso dute. Hala ere, gehienek Bilbo ezagutzen dute, batez ere Guggenheim Museoari eta Athletic futbol taldeari esker.
Zer zenekien zu hangoaz? Geneva oso nazioartekoa zela eta kultura ezberdinetako jendea zegoela. Ibonek Genevako arauak eta ordutegi zorrotzak ere azaldu zizkidan.
Zeintzuk dira zure etorkizunerako asmoak? Urte batzuk irakaskuntzan egin nahi ditut. Itzulerari dagokionez, familian asko hitz egin dugu. Nire emaztea ere euskalduna da, Arteakoa, eta uste dugu laster itzuliko garela, baina oraindik ez dugu data zehatzik .
