Zinegoak jaialdiko zazpi film ikusgai izango dira Torrezabal Kultur Etxean

TESTUA: Irati Alonso García
ARGAZKIA: Zinegoak

Duela bi egun hasi zen Zinegoak Bilboko LGTBIQ+ Nazioarteko Zinema eta Arte Eszenikoen Jaialdiaren 22. edizioa eta urtero moduan, hainbat herritan ikusi ahal izango dira jaialdiaren lanak. Galdakaon zazpi lan izango dira ikusgai gaur, ekainak 25, eta bihar.

Zinegoak Bilboko LGTBIQ+ Nazioarteko Zinema eta Arte Eszenikoen Jaialdiaren 22. edizioa astelehean hasi zen. Egoitza nagusia Bilbo den arren, urtero moduan hainbat herritan ikusi ahal izango dira jaialdiaren lanak, tartean Galdakaon.

Horrela, gaur eta bihar Galdakaoko Torrezabal Kultur Etxea izango da ‘ZGHedapena’ programaren eszenatokia. Gaur, ekainak 25, sei film labur ikusi ahal izango dira:

• Mdb (Mila Aquila, Argentina, 2025, 18 minutu): 2005. Pilarrek eta bere familiak Mar del Platako goi-klaseko hondartza batean igarotzen dute uda. Han ezagutu du Camila. Hirian, zurrumurrua zabaltzen hasi da, neska-lagunak direla. Bi nerabeek ezkutuan bizi dute lehen maitasuna, onartzen ez dituen gizarte baten aurrean.
• Arrecife (Angel Morales, Espainia, 2024, 14 minutu): Angel mastektomia egiteko zorian den pertsona trans bat da,89 urteko amonaren etxean bizi dena. Bere prozesua kontatzen du Angelek, itsasoa leku terapeutikoa dela berarentzat, baita disforiaz ere, eta, garrantzitsuena, gorputzarekin adiskidetzeaz, hau da, bere etxearekin.
• Queimando por dentro (Enock Carvalho, Matheus Farias, Brasil, 2024, 16 minutu): Samuel Neomendekoste Eliza Ebanjelikoko familia brasildar batean hazi zen. Bere sexualitatea esploratzen eta queer nortasuna besarkatzen hasi da, baina kolokan jarri zaio mundua, aitak elizan dantza egitea debekatu baitio. Bertatik bertara dauka bizitza aldatuko dion inflexio-puntua.
• Inkognita (Julen Gorosabel, Euskal Herria, 2024, 7 minutu): 1979ko ekainaren 10ean, zerbitzutik kanpo zegoen Guardia Zibil batek Francis izeneko transformista hil zuen Errenteriako Apolo tabernan. Gertakari hau Euskal Herriko LGTBIAQ+ mugimendua abiarazi zuen txinparta izan zen.
• Judo ka (Ander Iriarte, Euskal Herria, 2024, 11 minutu): Nerabezaroa une zaila da. Eskualdeko txapelketarako egun gutxi falta direnean, Judocak eraso arrazista bat jasan eta krisian sartzen da. Lehiatu ahal izateko autokontrola eta autoestimua landu beharko ditu.
• Azkena (Ane Ines Landeta, Euskal Herria, 2024, 9 min): Loreak ama eta amona ditu erreferentzia. Bi belaunaldi horien bitartez, emakumeei amatasunari dagokionean esleitu zaien loturari buruzko hausnarketa egiten du. Orain berari dagokio ama izan ala ez erabakitzea eta erantzun beharreko galderen erantzunak bilatzea.

Bihar aldiz, ekainak 26, Torrezabal Kultur Etxeak film bakarra hartuko du, kasu honetan film luze bat:

• Todo el silencio (Diego del Río, Mexiko, 2023, 78 minutu): Goizetan, zeinu-hizkuntzako irakaslea da Miriam, eta, arratsaldeetan, antzerki profesional batean parte hartzen du. Bien bitartean, harreman egonkor eta pasioz betea bizi du bere neska-lagunarekin, Lolarekin. Pertsona gor baten antzeko bizitza daukan arren, dena goitik behera amilduko zaio entzumena galtzen ari dela konturatzen denean.

Saioak doakoak izango dira, baina gonbidapena eskuratu behar da Torrezabal Kultur Etxeko leihatilan edo totemean, edo Udalaren webgunearen bidez.