Elkarlaguntza sarea
BINKE / 2019ko otsaila

«Gizartean nagusi den indibidualismoa gainditzea da gure helburua»

TESTUA ETA ARGAZKIA: Jon Gomez Garai

Supermerkatuan erosi ala hurbilekoa? Kanpoko produktuak ala bertakoak? Esplotazioa sustatu ala elikadura duina bermatu? Jokabide horien artean erabakitzea ez da erraza, eta bide hori erraztea du helburu otsailaren 21ean aurkeztuko den proiektuak.

Gero eta kontsumistagoa den gizarteari buelta eman eta norbere elikaduraren burujabe izateko ardura gero eta hedatuagoa da jendartean, baita gurean ere. Galdakaon Elkarlaguntza sarea sortu berri da, eta taldearen aurkezpena baino lehen elkartu da Binke eurekin, proiektuaren nondik norakoak hobeto ezagutzeko.

Zer da proposatzen duzuena? Elkarlaguntzan oinarritutako sare bat proposatu gura dugu proiektu berri honekin. Alde batetik guk, auzolanaren bitartez, hainbat produktu ekoizten ditugu zuzenean, eta bestetik, produktuak kolektiboki erosten ditugu, denon artean, gero nahi duenari eskaini ahal izateko.

Baina denda bat zarete ala elkarte bat? Elkarte bat gara, inork ez duelako soldatarik jasotzen, boluntarioak gara honen atzean gaudenak.

Non dago beraz zuentzako, bultzatzaileentzako, etekina? Proiektuaren parte garen guztiok jasotzen dugu etekin kolektiboa, nola edo hala. Alde batetik, denon artean lan eginez, kalitatezko produktuak prezio onean lortzeko aukera daukagu. Beste alde batetik, gurea ez da kontsumo talde hutsa, badu helburu politiko sakonago bat: egungo gizartean nagusi den indibidualismoa gainditzen hasi eta eraldaketa soziala bultzatzea. Gure ikuspuntua antikapitalista den heinean, hau da borroka honi egin nahi diogun ekarpena.

Eta zelan elkartu zineten? Galdakaon uste dugu badagoela beste era batera kontsumitzeko gogoa. Horren adierazle dira herrian dauden kontsumo talde eta denda desberdinak. Esperientzia hauek interesgarriak iruditzen bazaizkigu ere, muga asko dituztela uste dugu. Hortaz, planteamendu sakonago bat garatzeko elkartu ginen.

Nortzuk zaudete proiektu honen atzean? Hasi berri garenez, Galdakao eta inguruko hamabost bat etxe gaude oraingoz, baina gure proiektura ahalik eta etxe gehien batzea nahiko genuke!

Nor batu daiteke zuenera? Elkarlaguntzan aritu nahi duen edonor, ez dago baldintzarik.

Sare honen parte izateko ez da ekoizlea izan behar? Ez. Erosketen edo ekoizpenen alorrean parte hartzeko aukera dago, norberak erabakitzen du zertan. Gutariko batzuk erosketetan soilik hartzen dugu parte, beste batzuk ekoizpenetan eta badago baita ere bietan parte hartzen duenik.

Zeintzuk dira lokal honetan aurkitu ditzakegun produktuak? Janariarekin egiten dugu lan momentuz, baina beste produktu batzuetara zabaltzeko asmoa dugu. Produktu ez-galkorrak aurki ditzakegu batik bat —lekaleak, kontserbak, pasta,…— eta hurrengo hilabeteetan produktu freskoak izango ditugu eskuragarri.

Eta zeintzuk dira produktu guzti hauen ezaugarriak? Gure helburua ahalik eta produktu gehien guk geuk ekoiztea da. Erosten ditugunen artean balio etiko batzuk kontuan izaten ditugu: hurbiltasuna —km 0—, ekologikoa, denontzako moduko prezioak, ekoizleen lan baldintza duinak, kalitatea…

Jatea bizitzeko ala bizi jateko? Bizipozak elikagai gozoak behar ditu, ondo dakigu hori Euskal Herrian. Baina ustelduta dagoen munduak ez gaitu inoiz asetuko, eta ase bizi nahi dugu geuk! •