Giza-katea egingo dute barikuan Usansolon, erdigunean geltokia eskatzeko
TESTUA: Irati Alonso García
ARGAZKIA: Raúl Mendez
Geltokia Erdigunean plataformak barikuan Usansolon giza-katea egitera deitu du, udalerriko erdigunean metro geltoki bat aldarrikatzeko. Txapelenan geratuko dira 18:00etan eta hortik herri osoan zehar banatuko dira herritarrak.
Usansolotarrek, batez ere Geltokia Erdigunean plataformak deitutako mobilizazioen bitartez, herriko erdigunean Metro geltokia eskatzen jarraitzen dute. «Gaur egun erdigunean dugun tren geltokia kendu eta alternatiba urrunagoak jarriko dituzte», salatu dute.
Hain zuzen, hau da eskatuko dutena barikuan egingo duten mobilizazio berrian. Kasu honetan giza-katea egitera deitu du plataformak eta Txapelenan geratuko dira 18:00etan. Hortik, herri osoan zehar banatuko dira herritarrak eta 18:30ean entsegua egingo dute, gero 18:45ean grabaketa hasteko.
«Gure aldarrikapena da usansolotarrek garraio publikoan kalitaterik ez galtzeko modu bakarra, zenbait datuk berresten baitute herritarrek defendatzen duten alternatiba dela udalerriaren beharretara ondoen egokitzen dena», nabarmendu dute plataformatik.
Aurreko asteetan alderdi politikoen egoitzetan izan dira plataformako kideak eta hainbat usansolotar, BINKEk jaso zuen moduan, eta mobilizazioekin jarraituko dutela argi utzi dute: «Geltokia erdigunean lortu arte!».
