Hiri hondakin solidoak biltzeko eta garraiatzeko zerbitzua hobetuko du Galdakaok
TESTUA: Irati Alonso García
ARGAZKIA: Residuos Profesional
Galdakaoko Udalak hiri hondakin solidoak biltzeko eta garraiatzeko zerbitzua hobetuko du, kontratu berri baten bitartez. Besteak beste, lanen kontrola areagotuko da eta herritarrei orientazioa emango zaie.
Galdakaoko udaletxeko pleno aretoak martxoko udal osoko bilkura hartu zuen martxoaren 27an eta saio honetan hainbat erabaki hartu zituzten alderdiek. Besteak beste, AROA plan estrategiko berria onartu zuten aho batez, euskara indarberritzeko eta euskaldunak ahalduntzeko helburuz.
Animaliak edukitzeko eta babesteko ordenantza eguneratzea ere onartu zuten PSE-EEk aurkeztutako mozio baten bitartez, BINKEk jaso zuen moduan.
Hartutako beste erabakietako bat hiri hondakin solidoak biltzeko eta garraiatzeko zerbitzu berriaren kontratua esleitzea izan zen. Udalak adierazi duenez, «zerbitzua hobetzea» ekarriko du kontratu berriak.
Makinaria, teknika eta teknologia berrien laguntzarekin zabor bilketa hobe eta jasangarriagoa egitea ahalbidetuko du, lanen kontrola areagotuko da eta herritarrei orientazioa emango zaie, birziklatzeari begirako bereizketaren portzentaia handitzeko helburuarekin.
Horrez gain, edukiontzi guztiak berritu egingo dituzte, makinaria berria eskuratuko dute, hondakin organikoa botatzeko leku gehiago jarriko dira eta bilketa maiztasunak hobetu egingo dituzte.
