Ibaizabal ibaiaren inguruetan uholdeak saihesteko lanak amaitu dira
TESTUA: Irati Alonso García
ARGAZKIA: Jon Gomez Garai
Uraren Euskal Agentziak amaitu ditu Nerbioi eta Ibaizabal ibaien inguruetan uholdeak saihesteko lanak. Ibaien berbideratzeari esker Galdakao, Basauri eta Zaratamoko 5.200 pertsonek ur-goraldien arriskupean egoteari utzi diote, 11 urteko obren ostean. Hemen batu ditugu proiektuaren nondik norakoak.
Uholdeak ekiditzeko helburuz Ibaizabal ibaia berbideratzeko proiektua jarri zuen martxan 2010ean Uraren Euskal Agentziak eta lanak amaitu direla iragarri du gaur. Galdakao, Basauri eta Zaratamoko 5.200 pertsonek ur-goraldien arriskupean egoteari utzi diote proiektu honi esker.
Egoitze-lanen nondik norakoak gaur, azaroak 22, azaldu ditu Arantxa Tapia Ekonomiaren Garapen, Jasangarritasun eta Ingurumen sailburuak Galdakaoko Merkadillo zubiaren ondoan egindako agerraldian. Hitzorduan Antonio Aiz URA Euskal Agentziako zuzendari nagusiak, Aitor Aldasoro Ingurumen eta Jasangarritasuneko sailburuordeak, Iñigo Hernando Galdakaoko alkateak, Asier Iragorri Basauriko alkateak eta Alberto Ugarriza Zaratamoko alkateak ere parte hartu dute.
Tapiak proiektua hiru Udalekin egindako elkarlanaren emaitza dela azaldu du eta «uholde arriskua nabarmen murriztu» dela azpimarratu du. «Nahiz eta oraindik xehetasun batzuk falta diren, diseinatutako ibaiaren ahalmen hidraulikoa lortu da», adierazi du sailburuak.
Hernadoren hitzetan, «Galdakaorentzat oso garrantzitsua da proiektu hau, izan ere, lehen ia urtero uholdeak genituen eta azken bi urteetan jada ez dira gertatu». «Gainera, Ibaizabal ibaiaren inguruetan dauden txokoetaz gozatzeko aukera izango dugu orain herritarrok», adierazi du Galdakaoko alkateak.
Galdakaoko EAJ-PNVk ere bere zoriona agertu du proiektuak ekarriko dituen onuren aurrean. «Zalantzarik gabeko pozaren unea da ibaiertze honetako eta orokorrean bi udalerrietako bizilagun guztientzat, lan hauek ondorio pertsonal eta material larriak dituzten gainezkatzeei amaiera emango dien neurrian», adierazi du Ainhoa Agirregoikoa bozeramaileak.
Proiektuaren xehetasunak
Proiektu osoa egiteko 11 urteko obrak egin dituzte eta 36,2 milioi euroko aurrekontua izan dute. Hiru fasetan banatu dira lanak eta uholdeek eragindako espero zitezkeen kalte materialak 7 milioi eurotik 0,7 milioi eurora murriztu dira hauei esker. Guztira, 5,3 kilometroko ibilgua egokitu da.
Lehenengo fasean ibilguaren hustutze-ahalmena handitu zen Nerbioi ibaiaren 2.020 metroko tarte batean. Halaber, beharrezko obra eta zerbitzu-berritze guztiak egin ziren.
Bigarrenean aldiz, ibilgua 1.570 metroko tarte batean handitu zen, Nerbioi ibaiaren elkargunearen eta Ibaizabaleko Bengoetxe presa txikiaren artean. Horren ondorioz Urbiko eta Bridgestoneko zubiak aldatu behar izan zituzten eta Urbiko presa txikia partzialki eraitsi.
Hirrugarren fasean Ibaizabal ibaiaren funtzio hidraulikoa eta husteko gaitasuna hobetzeko obrak bildu dira: Bengoetxeko presa txikiaren eta Plazakoetxeko presa txikiaren arteko 1.640 metroko luzeran. Honekin pertsonen eta inguruneko jarduera ekonomikoaren segurtasuna areagotu da batetik eta bestetik, uholdeetatik babesteko lehen eta bigarren faseen gaitasuna handiagotu da.
Azken fase honen mugarri izan da Galdakaoko Merkadillo zubia handitu eta zaharberritzea. Eusko Jaurlaritzatik nabarmendu dutenez, «lehen ura husteko ahalmen gutzikoa zen».
Bestalde, jarduera gehigarriak egin dituzte inguruetan, besteak beste, Plazakoetxe zubiko zutabeen oinarriak sendotu dituzte eta erabileraz kanpo dagoen Bengoetxeko presa txikia eraitsi dute.
