Netflix Euskaraz ekimenak 10.000 sinadura lortu gura ditu
Ikus-entzunezkoak
BINKE / 2021eko martxoa
Netflix Euskaraz ekimenak 10.000 sinadura lortu gura ditu
TESTUA: Erredakzioa
ARGAZKIA: Aitzol Zamalloa
Aste eta erdian 6.000 sinadura batu ostean, Netflix Euskaraz ekimen herritarrak 10.000 sinadura batu gura ditu apirilaren 15erako. Mugimenduan usansolotarrak eta galdakoztarrak ere badaude, baita Binkeko kideak ere.
Netflix mundu mailako ikus-entzunezkoen plataforma pribatu handiena da, eta Madrilen du bere Europako egoitza, horrek ikus-entzunezkoen industrian dakarren inbertsioarekin. Ordea, streaming bidezko enpresa erraldoi honek espainiar estatuan aritzeko baimenak baditu ere, ez du euskara kontuan hartzen. Horregatik, «Netflixi edukiak euskaraz emititu ditzala eskatzeko» zenbait euskaltzalek mugimendu herritarra sortu zuten otsailaren 16an: Netflix Euskaraz, usansolotar bat eta hainbat galdakoztar tarteko, Binkeko kideak barne.
Sinadura bilketari Twitter bidez ekin eta bi astetan 6.000 sinadura jasotzea lortu zuen ekimenak. Azken egunetan ordea, moteldu egin da atxikimenduak jasotzeko hasierako erritmoa. Horregatik, ekimena sustatzen ari diren herritarrek hauspotu egin gura dute sinadura bilketa, eta hamar milara iristeko erronka jarri diote euren buruei.
«Sinadura kopuru horrekin euskal erakundeen aurrean indar egiten hasi gaitezkela uste dugu, bai behintzat euskalgintzaren entitateekin», aitortzen dute mugimendu berriko kideek. Euren asmoa, «behin erakundeek kasu eginda, euskalgintza batu eta Espainiako Gobernuari eskaera zehatza egitea da: exijitu diezaiotela espainiar estatuan jardun nahi duten ikus-entzunezkoen plataformei euskara ere kontuan hartzea euren bikoizketa eta ekoizpen propioetan».
Netflix Euskaraz ekimenaren arabera, «Netflixek eta beste streaming plataformek etekin ikaragarriak dituzte, eta ez diote tokian tokiko errealitate soziolinguistikoari erreparatzen», eta harago doaz herritar euskaltzale hauek: «Plataforma hauek —ez Netflixek bakarrik— dituzten irabazi erraldoien zati nabarmen bat bertako ikus-entzunezko lanetan inbertitzeko behartu egin behar zaie, baita euskaraz ere». Eta orain da hori zehazteko garaia, orain baita Espainiako Kongresua ikus-entzunezkoen legea tramitatzen ari. Datozen egunetan, indarrak batzen eta pausu zehatzak ematen hasiko bada ere, lehenengo pauso hau emateko herritarren laguntza eskatu du mugimenduak: apirilaren 15erako baietz 10.000 sinadura batu!
