Usansoloko ospitalean pediatria- eta erditze-zerbitzuak eskaintzea eskatu du Galdakaok
TESTUA: Irati Alonso García
ARGAZKIA: Galdakaoko Udala
Usansoloko ospitalea handitzean hemeretzi espezialitate eskainiko dira baina hauen artean pediatria- eta erditze-zerbitzuak ez daudela salatu dute hainbat elkartek. Kexak kontuan izanda, zerbitzu hauek eskaintzeko eskatu du Galdakaoko udalbatzak, atzo aho batez onartutako mozio baten bitartez. Bizkaiko Batzar Nagusietan ere bozkatu zen eskaera, baina ez zen onartu.
Eusko Jaurlaritzak Usansoloko ospitalean eraikin berri bat egingo zela iragarri zuen pasa den urtean. Handitze-lan horiei esker hemeretzi espezialitate eskainiko dira Labea auzoan kokatuta dagoen ospitalean.
Hauen artean ordea, ez daude pediatria- eta erditze-zerbitzuak. Horiek «beharrezkoak» direla salatu zuten 60 elkarte inguruk eta hauek eskatzeko sinadura bilketa egin zuten.
Kexa hauek entzun eta Galdakaoko Udal Gobernua osatzen duten EH Bildu, Auzoak, Podemos eta Usansolo Herria taldeek mozioa aurkeztu zuten atzoko osoko bilkuran. Eusko Jaurlaritzari Usansoloko ospitalean oinarrizko pediatria-zerbitzua eta arrisku baxuko erditzeen artatze-zerbitzua jartzea eskatu zioten honen bitartez.
«Gure herriko emakumeen erditze-momentu zaurgarri hori babesteko eta haien erabakiei eta beharrizanei eta gure herriko umeen larrialdiei eta ospitaleratzeei gure erreferentziazko ospitalean erantzun ahal izateko eskatzen dugu», azaldu zuten adierazpenean. Mozioa aho batez onartu zuen Galdakaoko udalbatzak.
Bizkaiko Batzar Nagusietan ere gaiaren inguruko bozketa egin zen atzo, Iraskunde, Gobernamendu On eta Gardentasunerako Batzordean. EH Bilduk 300.000 pertsona eta 70 udalerri baino gehiagoren beharrak betetzen dituen ospitale batean oinarrizko pediatriako eta arrisku txikiko erditzeei arreta emateko eremuak ezartzea eskatzea proposatu zuen, baina neurria ez zen adostu.
Podemosek alde egin zuen, baina EAJk eta PSE-EEk, biek Galdakaon alde bozkatu ostean, kontra egin zuten Bizkaiko Batzar Nagusietan. Talde Berezia-PP Bizkaia abstenitu egin zen.
