Eider Murgiaren BinkeTx bideoak bisita-marka guztiak hautsi ditu Instagramen
TESTUA: Erredakzioa
ARGAZKIA: Naiara Pérez de Villarreal
Instagram sarean momentuz 1.650 jarraitzaile pasatxo dituen Binke bezalako hedabide txiki batentzat asko da ia bere ikus-entzunezko guztietan 3.000 bisitatik gora jasotzea. Baina argitaratutako azken BinkeTx bideoak orain arteko marka guztiak hautsi ditu komunikabidearen kontuan. Instagrameko bideoen ‘top 5 zerrenda’ zein den jakin gura?
Otsailaren 12an formatu berri bati ekin zion Binkek, galdakoztar eta usansolotar ezagun zein xelebreak kameraren aurrean jarriz ‘challenge’ itxurako proba laburrak eginarazteko: BinkeTx. Ekimen berri honen hasieran jakinarazi bezala, hedabide honen asmoa bideook bi asterik behin —Binkesta kaleko inkestekin tartekatuz— argitaratzea da, Instagram eta TikTok kontuetan.
Aste Santuko oporraldia tarteko egonda beraz, orain arte lau BinkeTx argitaratu dira: Gaizka Chamizo aktore galdakoztarra, Andrea Arrizabalaga kazetari galdakoztarra, Jon Azkueta idazle usansolotarra eta Eider Murgia crossfiteko kirolari galdakoztarra. Bada, gainontzekoen bisita-kopuruak zinez errespetagarriak badira ere —3.000 bisitatik gorakoak denak Instagramen— azken honen bideoak, une honetan, 11.000 bisiten kopurua gainditu du Binkeren Instagrameko kontuan.
Murgiaren BinkeTx honek, Binkek ikus-entzunezko edukiak sortzen daraman ibilbide xumean, bisita-marka guztiak aise hautsi ditu Instagramen, bigarren bideorik ikusienari ia 4.000 bisitatik gorako aldea ateraz.
Hauxe da, 2022ko abendutik, Binkeren Instagrameko bideorik ikusienen ‘top 5 zerrenda’:
- BinkeTx Eider Murgia, 11.200 bisitatik gora.
- Igeriketa Inklusiboko erreportajea, 7.300 bisitatik gora.
- Merina Grisen zozketa, 6.500etik gora.
- Igeriketa Inklusiboaren amaierako irudiak, 5.500etik gora.
- BinkeTx Andrea Arrizabalaga, 4.400etik gora.
Hedabide hau osatzen duen lan-taldearen ustez —eta kontuan hartuta kopuru hauetan Instagrameko profila baino ez dela kontutan hartu— sare sozial honetan momentuz 1.650 jarraitzaile pasatxo dituen komunikabide txiki batek kopuru horiek izatea, bada seinale on bat: euskarazko tokiko komunikabideok, informatzeaz gain, oraindik erronka oparoa dugula aurretik entretenimenduaren esparruan ere.
