«Galdakoztarrek bizi proiektua herrian egin ahal izateko» etxebizitza plana aurkeztu du Udalak
TESTUA ETA IRUDIAK: Irati Alonso García
Galdakaoko Udalak hurrengo hiru urteetarako etxebizitza plana aurkeztu du gaur, «galdakoztarrek bizi proiektua herrian egin ahal izateko» helburuarekin. Planak lau ildo nagusi eta hainbat neurri zehatz ditu, eta hurrengo albistean batu ditugu hauen xehetasunak.
Galdakoztarrek bizitza proiektua herrian bertan egin ahal izatea nahi du Udalak eta horretarako haziak jartzen joan da azken urteetan. Bide honekin jarraituz, hurrengo hiru urteetarako etxebizitza plana aurkeztu du gaur Udal Gobernuak, Ibarluzeko zuzkidura bizitokietan egindako agerraldian.
Iñigo Hernando alkateak adierazi duenez, Galdakaon 961 etxebizitza hutsik daude ofizialki, hau da, inor erroldatuta ez dutenak, eta Etxebiden aldiz, Euskal Etxebizitzaren Zerbitzuan, 842 galdakoztarrek dute izena emanda bizitoki bat alokatu edo erosi nahi dutelako. «Datu hauek kontuan izanda, uste dugu instituzioek eta norbanakoek ardura hartu behar dugula etxebizitzaren merkatua lasaitzeko», adierazi du alkateak.
Udal Gobernuak bere aldetik, lau ildo nagusi dituen etxebizitza plana garatuko du. Alde batetik, Bengoetxen dagoen lurzoru bat erabiliko du 85 zuzkidura bizitoki egiteko, eta beste zati bat Eusko Jaurlaritzari lagako dio, honek beste 35 etxebizitza eraikitzeko.
Bestetik, hutsik daude etxeak alokairuan jartzeko neurriak martxan jartzea aurreikusten du planak. Guztira 6.500 euroko dirulaguntzak jaso ahal izango dituzte jabeek etxebizitzak konpondu eta gero alokairuan jartzeko: 3.000 euro irisgarritasuna eta eragikortasun energetikoa hobetzeko, eta beste 3.500 konponketa orokorrak egiteko. Gainera, etxebizitzak Alokabide programan jarri ezkero, Ondasun Higiezinen Gaineko Zergan %50eko hobaria izango dute jabeek.
«Badakigu gainera jabe handiek, bankuek eta putre funtsek etxebizitzak soilik inbertsio moduan dituztela, eta hauen aurrean kanona aplikatuko dugu beraien etxebizitza hutsak alokatzen jartzeko. Banaka espedienteak zabalduko dira eta metro kuadroko 10 euro ezarriko dira. Hau da, 70 metro kuadroko etxebizitza bati adibidez, urtean 700 euroko kanon bat aplikatuko zaio», azaldu du Hernandok.
Planaren hirugarren zutabea aldiz, Galdakaon dauden lokal komertzialei dagokie. Zehazki, lokal komertzialak etxebizitza bihurtzeko ordenantza malgutuko du Udalak eta berak izango du lehen eskubidea erosteko, eta ondoren etxebizitza publiko bihurtzeko.
Azkenik, Aperribai eta Jugo ingurua gune tenkatua izendatzen dutenean honek ekarriko dituen hobekuntzak nabarmendu ditu Hernandok: «Azken 5 urteetan alokatuta ez egon diren etxebizitzetan alokairua mugatuko da; indarrean dauden kontratuak 8 urtera arte luzatu ahal izango dira 5 beharrean; eta gaur egun alokatuta dauden etxebizitzetan prezioa KPIra mugatu ahal izango da».
«Asmoa neurri hauei esker etxebizitza merkatua lasaitzen joatea da», nabarmendu du Hernandok. Alkatearekin batera Udal Gobernua osatzen duten taldeko ordezkariak izan dira agerraldian, eta hemen utzi ditugu UHko Unai Etxezarragaren, Auzoakeko Monika Bailon eta EH Bilduko Edurne Espillaren hitzak.
