Kargutik kendu dute Galdakao Boleibol Taldeko zuzendaritza, zentsura-mozioa eztabaida artean onartuta
TESTUA ETA ARGAZKIA: Jon Gomez Garai
Gaur aurkeztu du Galdakao Boleibol Taldeko guraso talde batek klubeko presidentea eta zuzendaritza kargutik kentzeko zentsura-mozioa, BINKEk apirilaren 22an aurreratu zuen bezala. Ordubete eta erdiko eztabaida biziaren ostean, elkarteko bazkideen gehiengoak zentsura-mozioaren alde bozkatu du. Ondoko albistean batu dugu ezohiko batzarrak eman duena.
Galdakao Boleibol Taldeko Zuzendaritza Batzordearen kudeaketa ekonomikoaren «erabateko gardentasun faltarekin» eta «jokalariei transmititzen zaizkien printzipioekin» arduratuta, klubeko guraso talde batek zentsura-mozioa aurkeztu du gaur egungo presidentearen eta bere taldearen aurka, BINKEk primizian apirilaren 22an aurreratu zuen bezala. Ezohiko batzarra martitzen honetan, maiatzak 6, Gandasegi eskolako areto nagusian izan da 19:00etan hasita. Bertan elkartu dira klubeko jokalari asko, entrenatzaileak, Zuzendaritza Batzordean geratzen diren kideak —presidentea tarteko— eta egoerarekin arduratuta dauden jokalarien zenbait guraso.
Guztira 150 lagun inguru batu dira gaur eskola galdakoztarrean antolatu den ezohiko batzarrean. Bilkura hasi aurretik, eztabaida sortu da Zuzendaritza Batzordearen eta bertako dozenaka gurasoren artean, zentsura-mozioa nork bozkatu dezaken eta nork ez adosten aritu direnean. «Elkarteko bazkide bakoitzak bozka bana emateko aukera bakarrik dauka», aldarrikatu dute egungo zuzendaritzako kideek. Eta gurasoek leporatu egin diete «baietz, baina egungo Zuzendaritza Batzordeak ohiko bilkurarik deitu ezean ezinezko dirala bazkide barri horreik onartzea».
Bertaratu diren guztiek bozkatzeko aukera izan edo ez, zentsura-mozioa aurkezteari ekin dio lehenik eta behin M.A. Galdakao Boleibol Taldeko gurasoak, zentsura-mozioa aurkeztu duen guraso taldearen bozeramaile. «Jokalari eta guraso askoren bidaia-gastuak ordaintzeke izatea, entrenatzaile batzuen etxebizitza-alokairuak ia urtebete ordaindu barik egotea, dirulaguntzak itzuli behar izatea eta beste asko eskatu ez edo epez kanpo eskatu izana, urteko aurrekontuak asanbladan aurkeztu ez izana…» eta beste hamaika argudio eman ditu zentsura-mozioa aurkeztu duen guraso taldeak.
Behin zentsura-mozioaren adierazpena irakurrita hasi da bertaratutakoen eztabaida. Publiko artean eserita egon diren hiru lagunek egungo Zuzendaritza Batzordea defendatu dute, «zuzendaritzari leporatzen deutsazuena erakutsi ezin daitekela» esanez. Klubeko presidenteari ere hitz egiteko eskatu diete gurasoek, eta J.A. egungo presidenteak babesle pribatuei leporatu dienean publikotik altxatu da klubaren enpresa-babesleetako bat, «babesleek urteroko ekarpena egin dabela» esanez. Udalaren dirulaguntzak ere aipatu ditu zentsura-mozioa jaso duen presidenteak, eta orduan altxatu da Udalaren eta klubaren arteko egoera ondo ezagutzen duen guraso bat: «Udalak ezin deutso dirulaguntzarik emon zorrak daukazan alkarte bati, ez ez daualako gura, legez ezin daualako baizik».
Aurreko urteetako kontuak aurkeztu ez dituenean, sarritan galdetu diote gurasoek orain arteko presidenteari: «Zenbateko zorra dauka klubak?». Enegarrenez galdetu zaionean erantzun du J.A.-k: «Maiatzean dagokigu ohiko bilkuran kontuak aurkeztea». Orduan sortu da, beste behin, areto osoan harrabotsa, eta leporatze pertsonalak ere egon dira tarteko. Giroa berotzen hasi denean erabaki dute gurasoek eta Zuzendaritza Batzordeak, lehenengoz adostazunez, zentsura-mozioa bozkatzeari ekitea.
«Diru kontuak kudeatzeko gaitasun eza eta eskatu izan dan guztietan diru kontuak ez aurkeztea» izan dira gehien entzun diren kexak gurasoen artetik, eta horrek «Zuzendaritza Batzorde honekiko konfiantza falta handia» ekarri du zentsura-mozioa aurteztu duten gurasoen ahotik. Zuzendaritza Batzordea kargutik kentzeko proposamena klubeko 60 guraso inguruk sinatu eta aurkeztu dute. Eta ordubete eta erdiko eztabaida beroaren ostean ekin zaio bozketari.
Bozketari ekin zaionean, ordea, batzordeko kide batek bozketa ematera ilaran gerturatu diren hautesle askori esan die «ez daudela bozkatzeko aukera dutenen artean, ez diralako bazkide». Komunikabide hau ukazio horien lekuko izan da, bozkatzea ukatu zaien kide asko Galdakao Boleibol Taldeko aurpegi historikoak izan direna, eta bazkide-kuota ordaindu dutena.
Hala ere, bozkatu ahal izan dutenen artean (95 pertsona) eta ordubeteko bozketaren ostean, 21:30 pasatxo, orain arteko presidentea eta Zuzendaritza Batzordea kargutik kentzeko zentsura-mozioaren alde 68 bazkidek bozkatu dute, 26 bazkidek kontra eta bakar batek abstentzioaren alde egin du. Horrelako kasu batek eskatzen du hautesleen bi herenak gutxienez zentsura-mozioaren alde bozkatu behar izatea. Horrela ba, zentsura-mozioa onartu egin da eta orain arteko presidentea eta bere Zuzendaritza Batzordea karguetatik kaleratu egin dira. Jarraian, Zuzendaritza Batzorde berrirako hautagaiak bozkatu dituzte. Hau ere onartuta, aurrerantzean Zuzendaritza Batzorde berriak gidatuko du Euskal Herriko boleibolaren esparruan eredu den kirol-elkarte galdakoztarra.
