Atzo aurkeztu zuten 23. Korrika Galdakaon

TESTUA: Irati Alonso García
ARGAZKIA: Galdakaoko AEK

Gero eta gutxiago falta da 23. Korrika heltzeko eta Galdakaon atzo egin zuten euskararen aldeko ekimenaren nondik norakoak azaltzeko aurkezpena. Ekitaldia Torrezabal Kultur Etxean izan zen eta dozenaka lagun batu zituen.

Korrikaren 23. edizioak Euskal Herriko txokoak zeharkatuko ditu berriz euskararen alde. Aurten martxoaren 14tik 24ra antolatuko da, Irunen hasi eta Baionan amaituz. Galdakaotik eta Usansolotik ere igaroko da, bietatik martxoaren 21ean, BINKEk jaso zuen moduan.

Atzo egin zuten Galdakaon 23. Korrikaren aurkezpena eta honetan ekimenaren nondik-norakoak aurkeztu zituen AEK-k: omenaldia Azterketak Euskaraz plataformari zergatik egin dioten, ibilbidea nondik nora igaroko den, Korrika Txikia Galdakaon martxoaren 15ean egingo dutela ere adierazi zuten.

Halaber, oraindik Korrika Kulturaleko egitarauaren berri eman ez bazuen ere, besteak beste, herri bazkaria, erromeria eta pilota partidak antolatuko dituztela jakinarazi zuen AEK-k.

Torrezabal Kultur Etxean izan zen aurkezpena eta Jon Olea Galdakaon AEK-ko irakaslea denak, eta Ander Chamizo galdakoztarrak zuzendu zuten. Umorez beteriko saioa izan zen eta dozenaka lagun batu zituen, bai ekitaldi berak eta baita ostean eskaini zen mokadutxoan.

Usansolon bihar egingo dute 23. Korrikaren aurkezpena, Oinari Dantza Taldearen lokalean. Ekitaldiaren aurretik, 17:30etik 19:00etara, umeentzako tailerrak eskainiko dituzte eta 23. Korrikaren arropa salduko dute Unkina plazako frontoi txikian.