EAJk auzoen arteko Galdabusa Usansolora iristea eskatu du
TESTUA: Irati Alonso García
ARGAZKIA: EAJ-PNV Galdakao
Pasa den astelehenean martxan jarri zen Galdabusak bi linea izango ditu: Zuhatzutik Elexaldera eta Aperribaitik Mugurura. Usansolo auzoen arteko autobusaren ibilbidearen kanpo geratu dela salatu du EAJk eta «herriaren segregazio prozesua amaitu arte» zerbitzuan sar dezala eskatu dio Galdakaoko Udalari.
Astelehenean, uztailak 24, jarri zen martxan auzoen arteko Galdabusaren 2. linea, Zuhatzu eta Elexalde artekoa. Aperribai eta Muguru arteko 1. linea aldiz gaur bertan jarri da martxan, Binkek jaso zuen moduan.
Herritarren eskaerei erantzuten die proiektuak eta aurkezpenean Udalak azaldu zuenez, «helburua auzoen arteko komunikazioa hobetzea da, eta baita tokiko salmenta bultzatzea ere».
EAJ-PNVk ordea Galdabusaren proiektuak Usansolo kanpo utzi duela salatu du eta Galdakaoko Udaleko gobernu taldeari eskatu dio «autobusaren zerbitzuak bere ibilbidean Usansolo sar dezala segregazio prozesua amaitu arte eta udalerri bihur dadin».
Alderdiaren esanetan, «Usansoloko bizilagunak egungo zerbitzutik kanpo uzteak zergekin ere ordainduko duten zerbitzu publikoa kentzea da».
EAJ-PNVren arabera, Usansolo Galdabusako bi ibilbideetatik kanpo uzteko «aldebakarreko» erabakia hartu zuen gobernu taldeak, eta «inola ere ez beste erakunde batzuei egotzi ezina», «Galdakaoko Udalak berak 2022aren amaieran Aldundiko Garraio Sailari bidalitako idatzi batean islatzen den bezala».
«Usansolo udalerriaren bereizketa eta sorrera onartzeko Bizkaiko Batzar Nagusiek hartutako akordioa kontuan hartuta, 2022ko azaroaren 30ean Bizkaiko Aldizkari Ofizialean argitaratua, Udalak Usansoloko nukleoa eremutik kanpo uztea erabaki du», azaldu zuen Udalak idatzian. «Dena den, edozein arrazoirengatik segregazio prozesua amaitzen ez bada eta Usansolo udalerri gisa eratzen ez bada, hiri-bus zerbitzuaren lizitazioa arautuko duen pleguan aurreikusten da kontratua aldatzeko aukera Usansoloko nukleoa sartzeko aipatutako zerbitzu-kontratuan», adierazi zuen jarraian.
Azken pauso hau da EAJ-PNVk salatu duena «ez dela gertatu». Halaber, eta «zerbitzu honen eskaintza hobetzen laguntzeko asmoz», jeltzaleek bere maiztasuna handitzea eskatu du. «Egungo maiztasunean mantentzea, 40 minuturo, ez dio mesede egiten dion hiri mugikortasunari», nabarmendu dute.
