Sormene
BINKE / 2020ko abendua

Galdakaoko ikasleei rapa desmitifikatzen saiatu da La Basu gaur Sormenen

TESTUA: Beñat Armentia Arriandiaga
BIDEOA: Binke

Txaloka eta kantuan jarri ditu ikasleak La Basu San Antonioko raperak gaur goizeko Sormeneren tailerretan. Gaurkoa izan da ikastetxeek zuzenean parte hartu duten azkena. Hemendik aurrerako saio guztiak, ikasle zein gainontzeko herritarrentzako, streaming bidez jarraitu ahal izango dira.

Tailerrera bertaratutako gazteei galderak eginez abiarazi ditu gaur goizeko bi saioak Elena Caballerok, La Basuk, Euskal Herri zein mundu mailan zenbat rapero ezagutzen dituzten galdetuz nerabeei. Raparen eta hip-hoparen artean dauden aldeak ere zeintzuk diren azaldu ditu xehetasunez, lehenik, mugimendu honen baitan lau oinarri desberdin daudela azalduz —DJak, graffitiak, breakdance eta rapa— eta ondoren hauetako bakoitzaren nondik eta norakoak zeintzuk diren esplikatuz.  Baina gainera, horretaz gain, bosgarren oinarri bat ere sartu beharko litzatekela mahi-gaineratu du, beatbox-a, eta bideo baten bitartez lagundu du azalpena.

Esparru pertsonalagotik ere aritu da Etxebarriko San Antonioko bizilaguna, bere jatorria eta raparen munduan eman zituen lehen pausuak zeintzuk izan ziren gogoratuz. Are gehiago, inguratzen zuen kontextua medio hasiera urteak gogorrak izan zirela gaineratu du: «Gaztea nintzenean rapean ziharduten denak gizonezkoak ziren, eta besteek baino gehiago erakutsi behar nuen, inork ez zuelako nigan sinisten». Ondoren, bere lehen urteetan gaztelaniaz aritzen zela, baina urteek aurrera egin ahala hizkuntzaren rollak aldatu eta euskaraz egitearen hautua egin zuela azaldu die Galdakaoko bi ikastetxeko ikasleei.

Horrekin batera, raparen munduak azken urteetan bilakaera handia izan duela azaleratu du, bere iritziz, «dirua erditik sartu delako». Horren adibide erabili ditu oilar-gudak.

Eszenaren bilakaera eta aldaketarekin jarraituz, azkeneko urteetan aldaketa txiki batzuk izan direla ere azpimarratu du. Urteetan zehar rapa zeharo maskulinizatuta izan den generoa dela nabarmendu du, eta gaineratu, «zorionez, apurka-apurka eta erritmo geldoan bada ere emakumezkoen presentzia bai hemen zein kanpoan areagotzen hasi dela», horren adibide moduan erabili ditu Ziztada, Haizea edo Ningra. Saioarekin bukatzeko, gazteekin batera abestu eta horretaz gain hauen galderak ere erantzun ditu.

Gaur arratsaldean goizaren jarraipen bat egingo da hein batean —musika generoei dagokienez—, eta emakumeek euskal kantagintzan duten lekua hizpide duen solasaldi bat izatez gain, hiru kontzertu izango dira: J. Martina, Haizea eta Ningra, eta Kai Nakai.

Hemendik aurrerako saioak streaming bidez baino ezin izango dira jarraitu, egitarauan adierazitako ordutegiak jarraituz. Horretarako beraz, gure webgunearen hasiera-orritik jarraitu ahal izango dira saio guzti-guztiak, goizekoak zein arratsaldekoak.