Usansolo
BINKE / 2020ko otsaila

Hamaika urteren ostean, Usansoloren segregazio prozesua martxan da

Usansolok herri izaera duela ezin da ukatu, baina urte eta erdiko epean udalerri izatea ere ezin izango zaio ukatu —usansolotarrek hala erabakitzen badute behintzat—, Galdakaoko Udalak Usansoloren segregazio prozesuari argi berdea eman baitzion urtarrilaren 29ko ohiko udalbatzan.

Urtarrileko ohiko udalbatzean puntu bakarrak hartu zuen indarra udaletxeko areto nagusia lepo bete zuten herritarrentzat: Usansoloren segregazio prozesuari hasiera emango zion mozioa bozkatu behar zuten Udalean ordezkatutako alderdiek. Bozketa horretan PSE-EEko bi zinegotziak izan ziren kontra bozkatu zuten bakarrak. Gainontzeko alderdi guztiek, oposizioko EAJk barne, aldeko botoa eman zioten Usansoloren segregazio prozesua abian jartzeari.

Botazioari ekin aurretik, ordea, prozesu honen aurrean alderdi batzuek dituzten ñabardurak agerian gelditu ziren. Podemos-EQUOko Txelu Bernalek, esaterako, argi utzi zuen: «Ez gaude banaketaren alde baina alde bozkatuko dut, herritarren nahia horixe delako». EAJko Fernando Izagirrek bere aldetik, talde osoaren izenean azpimarratu zuen jeltzaleen «konpromisoa foru arauak errespetatzea izango dela, horregatik alde bozkatuko dugu hemen». Auzoak plataformako ordezkari den Mari Paz Losada alkateordeak alde bozkatuko zutela aurreratu zuen, «inor ezin daitekelako demokraziaren kontra egon».

Ez da aurrekoen iritzi berekoa PSE-EEko Txema Larrazabal, honek irmoki aldarrikatu zituelako «galdakoztar guztien interesak», bere ustetan, «ez delako bidezkoa gutxi batzuen interesak gehiengoaren gainetik jartzea, gainera ekonomikoki bideragarria ez den abentura bati hasiera emateko». EH Bilduren izenean Iñigo Hernando alkateak egin zuen berba, eta zorrotz erantzun zion Larrazabali: «Arrazoi ekonomikoek gaur ez daukie hemen lekurik, Usansoloren bideragarritasun ekonomikoa aztertzen dauan informerik ez daukagunean aurrean gainera», eta gaineratu, «’abentura’ bezalako berbak erabiltzea errespetu falta bat da hain serioa dan prozesu bati hasiera emongo deutsagunean». Horrez gain, prozesua gertutik jarraituko duten alderdi eta herritarrei alkateak aurreratu egin zien «arauek markatzen dabezan puntuak errespetatuko dirala une oro».

Usansolo Herria (UH) plataforma sortu zela hamaika urte bete diren honetan, Iñaki Urgoiti eta Agustin Aizpuru UHko zinegotziek esker oneko berbak baino ez zituzten izan, eurentzat «egun historikoa» zen horretan, eta «alderdi guztiei prozesu guzti honetan gure ondoan izateko gobidapena» egin zien. Gonbidapen horri adierazpen argiak gehitu zizkion Urgoitik: «Bistakoa da Usansolok Udala gura dauala, ba herria izan, bada». Eta aurreko adierazpena arrazoitu zuen, «Galdakaoko Udalak inoiz ezingo deutsalako lau kilometrora dagoan herri bati zerbitzu onik emon».

Udalbatzaren amaieran emoziozko negar aurpegiak ikusi ziren udaletxearen kanpoaldean eta irteeran pasilloa ere egin zieten usansolotarrek UHko zinegotziei eta alkateari. Bertan ziren Monika Mena UHren segregazioko ordezkaria eta Juan Landa abokatua: «Oso pozik! Babes zabala lortu dogulako, EAJren aldeko botoekaz be». Lanean hasteko ordua da orain. Bi hilabeteko epean Batzorde Mistoa osatuko da eta urtebete edo urte eta erdiko epean galdeketa loteslea egin ahal izango dute, Usansolo udalerri bilakatuko den edo ez bozkatzeko.