Usansoloko ospitaleko Iktus Unitatea, Europako onenen artean

TESTUA: Irati Alonso García
ARGAZKIA: Osakidetza

Usansoloko ospitaleko Iktus Unitateak Iktuserako Europako Erakundearen ESO Stroke Unit egiaztagiria lortu du. Aitortza hori asistentziaren kalitate-estandar zorrotzenak betetzen dituzten unitateek lortzen dute.

Usansoloko ospitaleko Iktus Unitatea 2011n jarri zen martxan eta ordutik 6.000 paziente baino gehiago artatu ditu. Orain, Iktuserako Europako Erakundearen ESO Stroke Unit egiaztagiria lortu du.

Aitortza hori jaso ohi dute asistentziaren kalitate-estandar zorrotzenak betetzen dituztela egiaztatzen duten Europako Iktus unitateek. Osakidetzan, akreditazio hori lortzen duen bigarren unitatea da, Gurutzetako Unibertsitate Ospitaleak lortutakoaren ondoren.

Osakidetzak ezagutzera eman duenez, egiaztatze-prozesu horretan hauexek ebaluatzen dira: emandako arreta klinikoaren kalitatea, giza baliabideen eta azpiegituren kudeaketa, garatutako ikerketa, eta prozesuen ebaluazioa. Hori guztia osasun-zentro guztientzat berdinak diren kalitate-estandar zorrotzetan oinarrituta.

«Hala bada, lorpen horrekin, Europako Erkidegoko punta-puntako Iktus unitateen parean dago Galdakao-Usansoloko Unibertsitate Ospitaleko Iktus Unitatea», adierazi du Osasun Sailak.

«Iktusa inpaktu sanitario eta sozial handia daukan gaixotasun zerebrobaskularra da, intzidentzia eta prebalentzia handia daukalako; izan ere, helduengan hartutako desgaitasunaren lehenengo kausa da. Karga handia dakarrena, osasunaren ikuspegitik ez ezik, ikuspuntu pertsonal eta familiarretik ere; berori pairatzen duten pertsonen eta haien zaintzaileen bizitzan daukan eraginagatik», azaldu du Pinedo doktoreak