Usansoloko Udalarekin adostutako lankidetza hitzarmena onartu zuen atzo Galdakaoko udalbatzak
TESTUA ETA ARGAZKIA: Irati Alonso García
Atzo, apirilak 25, osoko bilkura antolatu zuen Galdakaoko udalbatzak eta besteak beste, Usansoloko Udalarekin adostutako lankidetza hitzarmena onartu zuen. Udal Gobernuko taldeen baiezko botoekin, PSE-EEren abstentzioarekin eta EAJren kontrako botoekin adostu zen neurria.
Galdakaoko udalbatzak apirileko osoko bilkura egin zuen atzo, hilak 25, udaletxeko pleno aretoan. Hainbat izan ziren alderdiek jorratu zituzten gaiak eta eztabaida handiena Galdakaoko Udalaren eta Usansoloko Udalaren arteko lankidetza hitzarmenak sortu zuen.
Usansoloko Kudeaketa Batzordeak aurreko astean onartu zuen hitzarmena eta atzo berdina egin zuen Galdakaoko udalbatzak. Bizkaiko Foru Aldundiko, Galdakaoko eta Usansoloko teknikariek landutakoa da eta bi ildo nagusi batzen ditu: batetik, indarrean dauden kontratu bidez ematen diren zerbitzuak ematen jarraituko du Galdakaok, eta zerbitzu horiei dagokien kopurua ordainduko dio Usansolok Galdakaori urte amaieran egingo den likidazioan.
Bestetik, zenbait kudeaketa Galdakaok tramitatzeko akordioa onartu dute. Galdakaoko Udalak egingo duen lan hori ere kontabilizatu eta ordainduko dio Usansolok.
Neurria Udal Gobernua osatzen duten EH Bildu, Usansolo Herria eta Auzoak taldeen aldeko botoekin onartu zen, PSE-EEko ordezkariak abstenitu egin ziren eta EAJ-PNVko zinegotziek aldiz, kontra bozkatu zuten.
Jeltzaleen esanetan, «Udal Gobernua presaka onartzen saiatu da Usansolo-Galdakaoren arteko kudeaketa-hitzarmen aprobatzen oposizioko indarrei informaziorik eman gabe eta EH Bildu buru duen gobernu talde horrek sortu duen irregulartasun-egoera estaltzeko tresna juridikorik gabe».
«Egin beharreko lana ez da egin, eta orain presaka eta larrialdiekin etortzen zaizkigu, Galdakaoko Udaleko langileei lana bikoiztuz denbora hori guztia egin behar zuten zereginetan eta tresnarik eman gabe», adierazi zuen Ainhoa Agirregoikoa EAJ-PNVren bozeramaileak.
Besteak beste, Usansolo udalerri independentea izanik, bertako elkarteei dagozkien diru laguntzak Galdakaoko aurrekontuetatik kendu eta transferentzien eranskina horren arabera egokitzea; Palestinaren egoera salatzeko bi mozio eta Ibarluzen eraiki diren 60 zuzkidura bizitokien proiektua idatzi eta obrak egiteko kontratua egokitzea onartu zen ere atzoko osoko bilkuran.
