Ander Ozamiz galdakoztarra, Euskadiko Fitness txapeldun berria
TESTUA: Jon Gomez Garai
ARGAZKIAK: Euskadiko Fitness Txapelketa
Zapatuan antolatu zen Euskadiko Fitness Txapelketa eta Ander Ozamiz galdakoztarrak irabazi zuen Euskadiko gorputz klasiko onenaren saria. Berarekin hitz egin du BINKEk, honen nondik norakoak gehiago ezagutzeko asmoz.
Maiatzaren 25ean, zapatuz, Euskadiko Fitness Txapelketaren edizio berria antolatu zen Gernika-Lumoko Lizeo antzokian. Txapelketa honek gizon eta emakumeen itxura fisikoa saritu ohi du; hiru kategorietan epaitzen dira gizonen gorputzak eta bakarrean emakumezkoenak.
Gizonen hiru kategoriak Bodyline, Men’s Physique eta Men’s Classique dira. Azken honetan hartu zuen parte lehenengoz Ander Ozamiz galdakoztarrak. Lehenengoz parte hartu, eta irabazi.
Kategoria honetan gorputzaren simetria —atalen arteko oreka—, masa muskularra eta giharren definizioa hartzen dira kontutan, pisuan pasatu gabe. Sailkapen honetan parte hartzen dutenen gorputzak 80. eta 90. hamarkadetako gorputzen tankera dute, «gaur egun askok amesten daben gorputz handi eta pisutxu horretatik urrun», azaldu dio Ozamizek BINKEri.
Galdakoztarrak bi urte baino ez ditu egin bere gorputza lantzen, hedabide honi kontatu dionaren arabera: «Nire prestatzaile fisikoak erronka bota eustan, denbora-tarte laburrean nire gorputzak hartu eban bilakaera ikusita, eta nik erronka onartu neban».
