Galdakaoko etxe zaharren historia liburu batean bildu du Xabier Valenciak
TESTUA eta ARGAZKIA: Irati Alonso García
Xabier Valencia historialariak XVI. mendetik 1936 urtera arteko Galdakaoren historia biltzen zuen lana aurkeztu zuen duela hiru urte, baserriak eta etxeak aztertuz. Orain liburu batean batu du informazioa eta gaur aurkeztu dute historialari galdakoztarrak eta Olaia Parra Udaleko zinegotziak.
Munduko historia ezagutzeko «ezinbestekoa da tokiko historiari erreparatzea», Xabier Valencia historialari galdakoztarraren hitzetan. Hau abiapuntu hartuz, XVI. mendetik 1936 urtera arteko Galdakaoren historia biltzen zuen lana aurkeztu zuen 2020an, Binkek jaso zuen moduan.
Baserri eta etxeen geografia eta toponimia aztertuz, herrian izan diren aldaketak ezagutzera eman zituen Valenciak lan honen bitartez eta orain liburu batean bildu dituzte, datuak eguneratuz eta informazio berria sartuz. Dagoeneko eskuragai dago Torrezabalen, Kultura arloan, eta Udalak jakinarazi duenez, ikastetxeetan eta liburutegietan banatuko dute edozeinek irakurri ahal izateko.
Gaur aurkeztu dute liburua Xabier Valenciak eta Olaia Parra zinegotziak, Torrezabal Kultur Etxeko erakusketa aretoan egindako ekitaldian. Honetan, egindako lan guztia eskertu dio Parrak Valenciari: «Oso garrantzitsua da herriko historia biltzea eta ezagutzera ematea».
Valenciak azaldu duenez, Jugo, Aperribai, Bengoetxe, Urreta, Elexalde, Kurutze, Zamakoa, Zabalea, Plazakoetxe, Zuhatzu, Bekea, Eitzaga eta Basozabal auzoak batu ditu liburu honetan eta beste hainbat auzoetako elementuak jorratuko dituen bigarren bat argitaratuko duela iragarri du. «Dagoeneko idatzita dago eta denbora gutxi barru kaleratzea espero dugu», adierazi du historialariak.
Dokumentazio lan handia dago liburu honen atzean eta egiteko honetarako Onomastika Elkarteko kide diren Ander Ros eta Jose Alfonso Antequeraren laguntza jaso du Valenciak. «Nire lana haiek emandako eta nik lortutako informazioa batzea, ordenatzea eta jostea izan da», azaldu du historialariak.
